ಮರಳಿ ಬರಬಾರದೇ…?
ತುಡಿತದೆದೆಯ ಬಡಿತದಲೂ
ತಡವರಿಸುವ ಕನಸಲೂ
ದೇಹದ ಸಕಲ ನರ ನಾಡಿಯಲೂ
ತುಂಬಿರುವೆ ನೀನು
ಹೆಸರಿಲ್ಲದೆ ಅಳಿದು ಹೋದ ಬಂಧವಿದು
ಹೊಸ ಹೆಸರ ಕೊಡಬೇಕು..
ಆ ಹೆಸರ ನಾ ಕೂಗಿ ಕರೆಯಲು
ಓ ಎನುತ ನೀನೋಡಿ ಬರಬೇಕು
ನಿನ್ನ ಸೆಳೆತವಿರದ ಕ್ಷಣವಿಲ್ಲ
ನಿನ್ನ ನೆನಪಿರದ ದಿನವಿಲ್ಲ..
ನಿನ್ನ ಮರೆತು ಬದುಕುವ
ಕ್ಷಣಗಳ ಕಲ್ಪನೆಯೂ ನನಗಿಲ್ಲ
ಬತ್ತಿದೆ ನನ್ನೆದೆಯ ಮಾತು
ಬಿಕ್ಕಳಿಸುತಿದೆ ಹೃದಯ
ಅಳಿವು ಉಳಿವು ನಿನ್ನಲ್ಲಿದೆ
ಉಳಿಸು ಕಣೆ.. ನನ್ನ ಪ್ರೀತಿಯ
ಅಲ್ಲ ನನ್ನ ಜೀವವ.. ಜೀವನವ..!
ಶುಭವಾಗಲಿ ನಿನಗೀದಿನ..!
ಸೂರ್ಯನ ಪ್ರೀತಿಗೆ ಸೋತು
ಅರಳಿನಿಂತ ಸೂರ್ಯಕಾಂತಿಯ ಘಮೆ..
ಜೊತೆಗೆ ಮಳೆ ಹನಿಯ ತುಂತುರು…
ಹಕ್ಕಿಗಳ ಕಲರವ..ಜಿಗಿ ಹುಳಗಳ ಝೇಂಕಾರ..
ಆಯಿತು ಹೊಸ ಕನಸುಗಳ ಶುಭೋದಯ…!
ಮತ್ತೆ ಬಂದಿದೆ ಹೊಸ ಚೈತನ್ಯದ ನವ ದಿನ
ಹೊಸ ಬಯಕೆ ಹೊಸ ಕನಸುಗಳ ನವ ಜೀವನ..!
ಮುಂಜಾನೆಯ ಸವಿಯಲಿ ಮುಪ್ಪೂ ಯವ್ವನ!
ಹೊರಡು ನೀನು,ಶುಭವಾಗಲಿ ನಿನಗೀದಿನ..!
ಕಂಡ ಕನಸುಗಳ ನನಸಾಗಿಸೋ ಛಲ
ನಿನ್ನೆಗಳು ಕೊಟ್ಟ ನೋವನು ಮರೆಯುವ ಬಲ
ಸಾಧನೆಯ ಹಾದಿಯಲಿ ಮುನ್ನೇರುವ ಹಂಬಲ
ಕೊಡಲಿ ಈ ಹೊಸ ದಿನದ ರಾಶಿ ಫಲ!
ಹೊಸ ಕನಸ ಹೊತ್ತು ಸೂರ್ಯ ಏರಿದ್ದಾನೆ ಮೂಡಣ..
ಸಾಧನೆಯ ಎವರೆಸ್ಟ್ ಏರಬೇಕು.. ತೊಡು ನೀ ಪಣ!
ಗುರಿಯತ್ತ ಸಾಗಲಿ ನಿನ್ನ ಮುಂದಿನ ಪಯಣ..
ಸೋಲಿದೆ.. ಆದರೆ ಗೆಲ್ಲಬೇಕಿದೆ.. ಅದುವೇ ಜೀವನ..!
ಹೊರಡು ನೀನು,ಶುಭವಾಗಲಿ ನಿನಗೀದಿನ..!
ನೀ ನೆನಪಾಗಲು…
ಮತ್ತೆ ಯಾಕೋ ನೀ ನೆನಪಾಗಲು..
ಕಮರಿ ಹೋದ ಕನಸುಗಳು
ಮತ್ತೆ ಬಂದು ಅಣಕಿಸಿದಂತಾಯಿತು…
ಬತ್ತಿ ಹೋದ ಕಣ್ಣ ಗುಡ್ಡೆಗಳಲ್ಲಿ
ಮತ್ತೆ ನೀರಿನ ಆರ್ದ್ರತೆ ಪುಟಿದಂತಾಯಿತು..
ಅರ್ಧ ಕಟ್ಟಿದ್ದ ಕನಸೀಗ
ಕೈ ಬೀಸಿ ಕರೆದಂತಾಯಿತು…
ಅರ್ಧಕ್ಕೆ ನಿಲ್ಲಿಸಿದ್ದ ಕವನವೀಗ
ಮತ್ತೆ ಸೆಳೆದಂತಾಯಿತು
ಒಡೆದು ಚೂರಾದ ಹೃದಯಕ್ಕೆ
ಮತ್ತೆ ಈಟಿಯಿಂದ ತಿವಿದಂತಾಯಿತು…
ಬಯಕೆಗಳೇ ಇಲ್ಲದ ಜೀವಕೆ
ಮತ್ತೆ ಸಾವಿನ ಆಸೆ ಮೂಡಿಸಿದಂತಾಯಿತು…!
ಜಡ ಮಾತ್ರ ನನ್ನದು…!
ಕಣ್ಣು ನನ್ನದೇ…
ಆದರೆ.. ಆಕ್ಷಿಪಟದಲ್ಲಿ ಮೂಡುವ
ಚಿತ್ರ ನಿನ್ನದು, ಕಣ್ಣೀರು ನನ್ನದು..
ಹೃದಯ ನನ್ನದೇ…
ಆದರೆ.. ಉಚ್ವಾಸ ನಿಶ್ವಾಸದ
ಸಂವೇದನೆ ನಿನ್ನದು, ನೋವು ನನ್ನದು..
ದೇಹ ನನ್ನದೇ…
ಆದರೆ.. ಅಂತರ್ ದೇಹದ
ಆತ್ಮ ನಿನ್ನದು.. ಜಡ ಮಾತ್ರ ನನ್ನದು!
ಪ್ರೀತಿ…
ಕಥೆಯಿದು ,ಕಾವ್ಯವಿದು ,
ಕತ್ತಲ ಹೃದಯಕ್ಕೆ ತುಂಬೋ ಬೆಳಕಿದು ಪ್ರೀತಿ..
ಕೊಡುವ ಕಾಣಿಕೆಯಿದು,
ಪಡೆಯೋ ಭಾಗ್ಯವಿದು,
ನೊಂದ ಮನಸ್ಸಿನ ಸ್ವಾಂತನವಿದು ಪ್ರೀತಿ..
ನೋವಿದು, ನಲಿವಿದು,
ಚಿತ್ರ ವಿಚಿತ್ರವಿದು,
ಭಾವತಿರೀಕಕ್ಕೂ ಕಾರಣವಿದು ಪ್ರೀತಿ
ಬದುಕಿದು, ಬೆಸುಗೆಯಿದು,
ಬಂಧವಿದು , ಬಂಧನವಿದು
ಬರಡು ಭೂಮಿಯಲ್ಲೂ ಚಿಮ್ಮೊ ನೀರ ಕಾರಂಜಿಯಿದು ಪ್ರೀತಿ…