ನೀನು..

nenapinasanchi

ಕಡಲ ತಡಿ ನೀನು,
ಭೋರ್ಗರೆದು ಮೊರೆದು,
ಸಿಡಿದು, ಹಾಲ್ನೊರೆಗೆರೆದು,
ನಿನ್ನ ಭೇಟಿಯಲ್ಲಿ
ಶಾಂತ – ಅಲೆ ನಾನು..!

ಧರಿತ್ರಿ ನೀನು..
ನೀಲ ನಭದಿ ಕಪ್ಪಿಟ್ಟು
ಹಾರಿ ಹರಡಿ, ಗುಡುಗು ಸಿಡಿಲಿಗೆ
ಚದುರಿ ಹನಿಯಾಗಿ
ನಿನ್ನೊಳಗೆ ಲೀನ – ಮೇಘ ನಾನು..!

ಶರಧಿ ನೀನು..
ಕೆನೆದು ತೊನೆದು
ಧುಮ್ಮಿಕ್ಕಿ ಹರಿದು,
ನಿನ್ನ ಸೇರುವ ಅನವರತ
ಧಾವಂತದ- ನದಿ ನಾನು.. !

ತಾಯಿ ನೀನು…
ಪೆಪ್ಪರಮೆಂಟಿಗೆ ಸೋಗು ಹಾಕಿ
ಅತ್ತು ಕೂಗಿ ಕರೆದು, ರಚ್ಚೆಹಿಡಿದು
ನಿನ್ನ ಮಡಿಲ ಸಾರ್ಥಕ್ಯದಲ್ಲಿ
ಜಗ ಮರೆವ – ಮಗು ನಾನು…

~ಹುಸೇನಿ

Leave a comment

ಒಬ್ಬಂಟಿಯಾದುದು..

beautiful_eye_small

ನಿನ್ನ ಕಣ್ಣಂಚಿನ
ದೇದೀಪ್ಯಮಾನ
ಬೆಳಕಿನಿಂದ
ನನ್ನೀ
ಹೃದಯ
ಚಲಿಸುತ್ತಿದ್ದರಿಂದೇನೋ
ನೀ
ಅಗಲಿದಾಗ
ಏಕಾಂತತೆಯ
ಕಾರಿರುಳಲ್ಲಿ
ನಾನು
ಒಬ್ಬಂಟಿಯಾದುದು..


ಹೇಗಿದೆ ಹೇಳಿ

ಕಣ್ಣಲ್ಲೇ ಇರುವೆ…!

Tear-Falling

ಇಂದು
ನೀ ನನ್ನ
ಅಗಲಿ ಹೋದರೂ..
ನಿನ್ನ
ನೆನಪುಗಳಿಂದ
ಮಾಸಿ ಹೋದರೂ..
ಎಂದಾದರೂ
ನಾ ನಿನ್ನ
ನೆನಪುಗಳಲ್ಲಿ
ಮೂಡಿದರೆ
ಹುಡುಕದಿರು ನೀನನ್ನ..
ಮತ್ತೆಲ್ಲಿಯೂ..
ನಾನಿನ್ನ
ಕಣ್ಣಲ್ಲೇ ಇರುವೆ;
ಒಂದು ಹನಿ ಕಣ್ಣೀರಾಗಿ…!


ಹೇಗಿದೆ ಹೇಳಿ

ನೀನೆಂದರೆ..

shadow and girl

ನೀನೆಂದರೆ..

ಕಾದು ಕಾವಲಿಯಾದ ಮನಸಿಗೆ
ಹೊಂಗೆ ತಂಪು
ಇರುಳ ಕರಾಳತೆಯಲ್ಲಿ
ಕಳೆದು ಹೋಗುವ
ಕನಸು..!

ನೀನೆಂದರೆ..

ಕಲ್ಪನೆ, ಪರಿಕಲ್ಪನೆ
ಬದಲಾವಣೆ!
ನಾಳೆಯ ನಿರೀಕ್ಷೆ,
ಪ್ರತೀಕ್ಷೆ !

ನೀನೆಂದರೆ..

ಮುಂಗುರುಳು ಮುಂಜಾನೆಯ
ಮಂಜ ಹನಿ,
ಕೇಳಿದಷ್ಟೂ ಕೇಳಬೇಕೆನಿಸುವ
ಕಹಾನಿ!

ನೀನೆಂದರೆ..

ನನ್ನೊಳಗಿನ ತುಮುಲ,
ಹೊಯ್ದಾಟ!
ತನ್ನ ಅಸ್ತಿತ್ವಕ್ಕಾಗಿ
ಮಾತಿನ ಮೊರೆ ಹೋದ
ಪರಾವಲಂಬಿ ಮೌನ !

ನೀನೆಂದರೆ..

ಭರವಸೆಯ ಆಲಿಂಗನ,
ಕಣ್ಣೋಟದ
ಸಿಹಿ ಚುಂಬನ…!
ಒಂಟಿ ಕತ್ತಲ ಏಕಾಂಗಿತನ..

ಮತ್ತೆ ನನ್ನೀ
ಜೀವನ..!


ಹೇಗಿದೆ ಹೇಳಿ

ಹುಸೇನಿ ಪದ್ಯಗಳು – 12

images (1)

೧.
ನನ್ನ ನಿನ್ನ ನಂಟು
ಬಿಲ್ಲು-ಬಾಣದಂತಂದೆ ನೀನು;
ಗಮ್ಯ ಸೇರಲು ಬಾಣ
ಬಿಲ್ಲನ್ನು ತೊರೆಯಲೇಬೇಕು..
೨.
ಇಲ್ಲಿರುವುದು ಬರೀ
ಛಾಯೆ;
ನನ್ನೊಳಗೆ ಪದವಾಗದೆ
ಉಳಿದದ್ದು ಕವಿತೆ..
೩.
ನಿನ್ನೆಯೊಳಗಿನ ನೀನು
ನನ್ನ ಇಂದನ್ನು ನುಂಗಿದೆ;
ಕಾಡಬೇಡ ಹೀಗೆ,
ನಗುವ ನಾಳೆಯನು
ನಾ ನೋಡಬೇಕಿದೆ..

೪.
ಕಂಡ ಕನಸು ಮಾಸಿ
ಹೋಗಬಹುದು;
ಕಾದು ಕುಳಿತ
ಮನಸ್ಸಿನ ನೋವು..?


Leave a Comment

ಕನ್ನಡ ಬ್ಲಾಗಲ್ಲಿ ನೋಡಲ್ಲಿ ಇಲ್ಲಿ ಕ್ಲಿಕ್ಕಿಸಿ
nano-mecchuge

ದನಿಯಾಗದ ಹನಿಗಳು(ಹುಸೇನಿ ಪದ್ಯಗಳು – 11)

1.
ನೀ ಕೊಟ್ಟ ನಲಿವಿಗಿಂತ
ನೋವುಗಳೇ ಹೆಚ್ಚು
ಅಪ್ಯಾಯಮಾನ…!

2.
ಪರ್ವತದೊಳಗೂ
ಬೆಂಕಿಯಂತೆ..,
ನನ್ನೊಡಲೊಳಗೆ
ನಿನ್ನ ನೆನಪಂತೆ…!

3.
ನಿನಗೆ ಗೊತ್ತೇ ಗೆಳತಿ..?
ನನಗೆ ಸ್ವರ್ಗದಿಂದ
ಉಡುಗೊರೆಯೊಂದು ಸಿಕ್ಕಿದ್ದು,
ಅದು ನೀನೆ…!

4.
ನೀ ನನ್ನ ಹೃದಯವ
ಕೊಂದವಳಲ್ಲ…!
ಸತ್ತ ಹೃದಯದೊಂದಿಗೆ
ಬದುಕಲು ಕಲಿಸಿದವಳು..!

5.
ಧುತ್ತೆಂದು ಒಸರಿ ಬರುವ
ಕಣ್ಣೀರನ್ನೂ ಹರಿ ಬಿಡುವ
ಮನಸ್ಸಿಲ್ಲ, ಅದು ನೀನನಗೆ ಕೊಟ್ಟ
ಕೊನೆಯ ಉಡುಗೊರೆ…!


Leave a Comment

ಕನ್ನಡ ಬ್ಲಾಗಿನಲ್ಲಿ ಓದಲು ಇಲ್ಲಿ ಕ್ಲಿಕ್ಕಿಸಿ

ಹುಸೇನಿ ಪದ್ಯಗಳು – 10


ಎಲ್ಲೆಲ್ಲೋ ಹುಡುಕಿದೆ ನಿನ್ನ,
ನನ್ನೆದೆ ಮಿಡಿತದ
ತಾಳವನ್ನರಿಯದೆ…!
***

ಸಾಗರ ತಡಿಯಲ್ಲಿ
ಮುತ್ತಿನ ಚಿಪ್ಪಿನೊಳ
ರತ್ನದಂತೆ ನನ್ನೆದೆಯಲಿ
ನಿನ್ನ ನೆನಪುಗಳು…!
***

ನಿನ್ನ ನೆನಪುಗಳ
ಪೋಣಿಸಿ ಬರೆದ
ಕವಿತೆಯ ನೀ ಮೆಚ್ಚಿ ಮುತ್ತಿಟ್ಟೆ
ನೋಡು, ಅದಕ್ಕೀಗ ವಯ್ಯಾರ…!
***

ನನ್ನ ನಿನ್ನ ನಡುವೆ ಆಡದೆ
ಉಳಿದ ಮಾತುಗಳು
ಬೆಂಕಿಯುಂಡೆಯಾಗುವ ಮೊದಲೇ
ನಾ ನಿನ್ನೊಳಗೆ ಸ್ಪೋಟಿಸಬೇಕಿದೆ…!


Leave a Comment

ಕನ್ನಡ ಬ್ಲಾಗಿನಲ್ಲಿ ಓದಲು ಇಲ್ಲಿ ಕ್ಲಿಕ್ಕಿಸಿ

ಪ್ರೀತಿಯ ಅಗಾಧತೆ

ಎಲೆಗಳು ಪರಸ್ಪರ ತಾಕದಿರಲು
ದೂರ ದೂರದಲಿ ನೆಟ್ಟ ಮರಗಳು
ಭೂಗರ್ಭದಲಿ ಬೇರುಗಳೊಡನೆ ಬೆರೆತು
ಮತ್ತೆ ಒಂದಾಗುವುದು…..

ಪರ್ವತದ ಹಲವು ದಾರಿಯಲ್ಲಿ
ಚಿಮ್ಮಿ ಬಂದ ನೀರಿನ ಒರತೆ
ನೀಲಿ ಸಾಗರದ ತಡಿಯಲ್ಲಿ
ಮತ್ತೆ ಒಂದಾಗುವುದು…..

ಪ್ರಿಯೇ .. ನಮ್ಮೊಳ ಪ್ರೀತಿ
ನಿಜವೇ ಆಗಿದ್ದರೆ ಯಾವ
ಶಕ್ತಿ ತಾನೇ ನಮ್ಮನ್ನು ದೂರ ಮಾಡೀತು ?


Leave a Comment

ಕೊಲ್ಲುತಿದೆ..

ನೀ ಕೊಟ್ಟ ನೋವನ್ನು
ಎದೆಯಾಳದಲ್ಲಿ
ಅಡಗಿಸಿದ್ದೆ..
ಅದು ನಿನ್ನ ಕೊನೆಯ
ಉಡುಗೊರೆಯೆಂದು
ಸಂಭ್ರಮಿಸಿದ್ದೆ..
ಈಗ ನೋಡು
ಅವು ಕೊಳೆತು
ಕೊಲ್ಲುತ್ತಿವೆ …


Leave a Comment

Blog at WordPress.com.

Up ↑

%d bloggers like this: