ಮುಸಾಫಿರ್ ಪದ್ಯಗಳು – 3

1.
ಒಂದು ನಿದಿರೆಯಲ್ಲಿ
ಲಕ್ಷ ಬೆಲೆಬಾಳುವ ಔಷಧಿಯಿಟ್ಟ ದೊರೆಯ ಬಳಿ
ಕೊರತೆ ಹೇಳುವೆಯೇಕೆ ..?
ಕರಗು ಕರಗು ನಗುತ್ತಲೇ ಕರಗು
ಚಿನ್ನವಾಗಲು ಕುಲುಮೆಯಲ್ಲಿ ಕರಗುವ ಅದಿರಿನ ಹಾಗೆ,
ಮಲಗು ಮಲಗು ಸುಮ್ಮನೇ ಮಲಗು
ಹಕ್ಕಿಯೊಂದು ದಟ್ಟಡವಿಯಲ್ಲಿ ಪಾಚಿಕೊಂಡ ಹಾಗೆ.

2.
ಈ ನೀರವ ಏಕಾಂತದಲ್ಲೂ
ಅನಾಮಿಕ ಹೂವೊಂದು
ಪರಿಮಳ ಹೊತ್ತು ತರುತ್ತಿದೆ.
ನನ್ನ ಖುದಾ ನನಗಾಗಿ ರಾತ್ರಿ ಹಗಲು
ಏನೆಲ್ಲಾ ಸಿದ್ಧತೆ ಮಾಡಿಡುತ್ತಾನೆ ನೋಡಿ.

3.
“ಭಿಕ್ಷೆ ಬೇಡುವುದನ್ನು ನಿಷೇಧಿಸಲಾಗಿದೆ”
ಎಂಬ ಬೋರ್ಡಿಗೆ ತಗುಲಿದ ವೆಚ್ಚದಲ್ಲೇ
ಒಂದು ಬಾರಿಯಾದರೂ ಉಣಿಸಬಹುದಿತ್ತು.
ನೀನಾದರೋ ಒಂದು ಅನ್ನದ ಅಗುಳೂ
ಸೃಷ್ಟಿಸಲು ಅರಿಯದೆ ನನ್ನ ದೊರೆಯ ಭಿಕ್ಷೆಯಲ್ಲಿರುವವ.

4.
ದಾಟಿ ಬಂದ ಯಾವ ದಾರಿಯಲ್ಲೂ
ಮುಳ್ಳು ಉಳಿಸಿ ಬರಬೇಡ .
ಬದುಕನ್ನು ದಾಟುವುದೆಂದರೆ
ಹಲವು ದಾರಿಯನ್ನು ಮತ್ತೆ ಮತ್ತೆ ಬಳಸುವುದು.
ಹಾಗಾಗಿ ಮುಳ್ಳು ಉಳಿಸಿ ಬಂದರೆ
ಏನಾದೀತೆಂದು ತುಂಬಾನೇ ಎಚ್ಚರವಿಟ್ಟುಕೋ

-ಮುಸಾಫಿರ್

ಮುಸಾಫಿರ್ ಪದ್ಯಗಳು – 2

1.

ಯಾಕಿಷ್ಟೊಂದು ಹಠ ಹುಡುಗೀ,
ಒಂದೊಮ್ಮೆ ನಮ್ಮ ದಿವ್ಯ ಕನಸು
ಪ್ರಸವವಾಗಲೇಬೇಕಿರುವ ಕ್ಷಣದಲ್ಲೂ
ಹೀಗೆ ಹಠ ಹೂಡಿಬಿಟ್ಟರೆ
ಗಂಡಸಿನ ಅಸಹಾಕತೆ ಜಗಜ್ಜಾಹೀರಾಗದೇ ?

2.

ಲಾಲಿ ಹಾಡುವ ಎದೆಯ ಆಸೆಗಳು
ಮಲಗಿ ನಿದ್ರಿಸಲು ನೀನೇ ಬೇಕೆನ್ನುವ
ಸಣ್ಣ ಹಠಕ್ಕೆ ಕಾದು ಕುಳಿತಿದೆ.
ಸದಾ ಹಠಮಾರಿಯಾದ ನೀನು
ಈಗಿದಿಷ್ಟು ಬದಲಾಗಬೇಕಿರಲಿಲ್ಲ..

3.

“ಅಲ್-ವಫಾ” ಬೆಟ್ಟದ ಕುಳಿರಲ್ಲಿ
ವಿರಹದ ಆತ್ಮದ ಬೆವರೊರೆಸಿಕೊಳ್ಳಲು
ನಿದ್ದೆಗೆ ಜಾರುವ ನತದೃಷ್ಟ ಹೆಣ್ಣೇ,
ಸ್ವಲ್ಪ ಗಟ್ಟಿಗೊಳ್ಳು,
ಮರುಭೂಮಿಯಲ್ಲಿ ಕುಳಿರು ವರ್ಷಿಸುವ
ಖುದಾ ನ ಕಡೆಗೆ ಈ ಒರಟನ ಕೈಗಳಿವೆ.

4.

ನಿನ್ನ ಕಾರಣಗಳನ್ನು
ನಾನು ಒಪ್ಪುವುದಿಲ್ಲ
ತಾಯಿ ಬೇರು ಕೀಳುವಾಗ
ಸಣ್ಣ ಸದ್ದೊಂದು ಬಂದೇ ಬರುತ್ತದೆ..

~ಮುಸಾಫಿರ್

ಮುಸಾಫಿರ್ ಪದ್ಯಗಳು – 1

1.
ಸದಾ ಅಕ್ಕರೆಯ
ಬೆನ್ನು ತಟ್ಟಿಸಿಕೊಳ್ಳಲು ಬಂದು,
ನನ್ನ ರಾತ್ರಿಗಳನ್ನು ಕಬಳಿಸುವ
ಅಸಹಾಯಕಳೇ ಕೇಳು,
ನನಗೆ ಹಗಲುಗಳಲ್ಲೂ
ಒಂಟಿತನದ ಕೆಲಸವೇ ಇದೆ.

2.
ಒಂದಿಷ್ಟು ಸಕ್ಕರೆಯ ಉಗುಳಿದರೆ
ಅನಾಮತ್ತು ಎರಡು ಹೊತ್ತಿನ
ಕಾಫಿಗಾದರೂ ಆಗುತ್ತಿತ್ತು
ಈ ದಿಕ್ಕೆಟ್ಟ ಬದುಕಿನಲಿ.
ದುರಾದೃಷ್ಟ ಹಿಂಗೂ ಆಯಿತು ನಮ್ಮದು,
ಈಗೀಗ ಉಗುಳುವುದಕ್ಕೂ
ನೀನು ಲೆಕ್ಕಾಚಾರ ಹಾಕತೊಡಗಿದೆ.

3.
ಸಂಜೆವರೆಗೂ ದುಡಿಯುವ ನೀನು
ಇಷ್ಟೊಂದು ಅಕ್ಷರಗಳನ್ನು
ಎಲ್ಲಿಂದ ತರುವೆ ಈ ರಾತ್ರಿಗಳಲ್ಲಿ
ಎಂದು ಚಿಕ್ಕ ಹುಡುಗನೊಬ್ಬ ಕೇಳಿದ;

ಇದು ವಂಚಕರ ನಿರ್ದಯಿಗಳ ದುನಿಯಾದಲ್ಲಿ
ಸಿಗುವ ದಿನಗೂಲಿಯೆಂದು ನಗುತ್ತಲೇ ಹೇಳಿದೆ.

4.
ಅಡ್ಡದಾರಿ ಹಿಡಿಯದೆ
ನಡೆಯುವಾಗ
ಭಯ ಅನ್ನುವುದು
ಅಪರಿಚಿತವಾಗಿಬಿಡುತ್ತದೆ.
ಹಾಗಂತ ಹೆದರುಪುಕ್ಕಲರೆಲ್ಲ
ಅಡ್ದದಾರಿಯಲ್ಲಿ ನಡೆಯುವವರು ಎಂದಲ್ಲ
ಅವರು ಮತ್ತಷ್ಟು ಸತ್ಯದ ದಾರಿಯ ಉಮ್ಮೀದು ಇಟ್ಟುಕೊಂಡವರಿರಲೂಬಹುದು.

~ಮುಸಾಫಿರ್

ನ್ಯಾನೋ

ಅದೊಂದು ಬೃಹತ್ ದೇಶಭಕ್ತರ ಸಂಗಮ. ದೇಶಭಕ್ತ ಚಿಂತಕರಿಂದ ದೇಶದ ಸಂಪದ್ಭರಿತ ಇತಿಹಾಹಾಸದ ಬಗ್ಗೆ ಬಹುಪರಾಕ್ ಭಾಷಣಗಳು. ಬೇಳೆಕಾಳುಗಳ ರೀತಿಯಲ್ಲಿ ವಜ್ರ ವೈಢೂರ್ಯಗಳನ್ನು ಮಾರುವ ಆ ಕಾಲದ ಕಥೆಯನ್ನು ಕೇಳಿದ ಶೋತೃಗಳ ಮೈಮನ ಪುಳಕಗೊಂಡಿತು. ಜಯಘೋಷದೊಂದಿಗೆ ಮನೆಗೆ ಮರಳಿದರೂ ಇನ್ನೂ ಮುಗಿಯದ ರೋಮಾಂಚನ.

ಆ ಗಲ್ಲಿಯಲ್ಲಿ ಹಸಿವಿನಿಂದ ಸತ್ತುಬಿದ್ದ ಅಮ್ಮನ ಸ್ತನಪಾನಕ್ಕೆ ಹಾತೊರೆಯುತ್ತಿದ್ದ ಮಗುವಿನ ಬಗ್ಗೆ ನಿನ್ನೆಯೊಂದು ವಾರ್ತೆಯತ್ತು.

ಓ ಮನುಷ್ಯಾ ! ಇದು ನಿನಗೊಂದು ಎಚ್ಚರಿಕೆಯ ಕರೆಗಂಟೆ..!

ಎಲ್ಲಡಗಿ ಹೋಯಿತು ನಿನ್ನ ಸೊಕ್ಕು? ಎಲ್ಲಿ ಸೋರಿ ಹೋಯಿತು ನಿನ್ನ ದಾರ್ಷ್ಠ್ಯತನ? ಎಲ್ಲಿ ಹೋಯಿತು ಪರ್ವತ ಪತಾಕೆಯ ಮೇಲೂ ಹೂಂಕರಿಸುವ ನಿನ್ನ ಸಿಂಹಾಸನ ?. ಜಗತ್ತನ್ನೇ ಗೆಲ್ಲುತ್ತೇನೆ ಎನ್ನುವ ನಿನ್ನ ದರ್ಪ ಎಲ್ಲಿ ಸೊಲ್ಲಡಗಿ ಹೋಯಿತು ?. ನಿನ್ನ ಹಿಂಬಾಲಕ ಪಡೆಯೊಂದಿಗೆ ನೀ ಕಟ್ಟಿದ ಸೈನ್ಯ ಸಾಮ್ರಾಜ್ಯಗಳು ಎಲ್ಲಿ ಹೋದವು? ನಿನ್ನ ಒಕ್ಕೂಟಗಳು ಮತ್ತು ಪ್ರತಿಷ್ಠಾನಗಳು ಏನಾದವು?.

ಮನುಷ್ಯ … ಚಂದ್ರನನ್ನು ತನ್ನ ಕಾಲಡಿಗೆ ತಂದ, ಮಂಗಳಕ್ಕೂ ದಾಪುಗಾಲಿಟ್ಟ ಮನುಷ್ಯ .. ! ಈ ಪ್ರಪಂಚದ ಎಲ್ಲವನ್ನೂ ತನ್ನ ಕೈಕುಣಿಕೆಯ ಒಳಗೆ ಆಟವಾಡಿಸುವ ಮನುಷ್ಯ .. ಅಪ್ಪಟ ಕಾಡುಪ್ರಾಣಿಗಳನ್ನು ಪಳಗಿಸಿದ ತನ್ನ ದಾಸ್ಯಕಿಟ್ಟ, ಜಗದ ಅತ್ಯಂತ ಎತ್ತರದ ಪರ್ವತದ ಮೇಲೆ ಪತಾಕೆ ಹಾರಿಸಿದ, ಭೂ ಪದರದ ಸಂಪನ್ಮೂಲ ಕೊಳ್ಳೆ ಹೊಡೆದು ಸಾಮ್ರಾಜ್ಯ ಕಟ್ಟಿದ ಮನುಷ್ಯ.. ತನ್ನಂತೆಯೇ ಯಂತ್ರ ಮಾನವನನ್ನ ನಿರ್ಮಿಸಿ ಅದಕ್ಕೆ ಬುದ್ಧಿಮತ್ತೆಯನ್ನು ತುಂಬಿದ ಮನುಷ್ಯ. 100 ಕಿ.ಮೀಟರ್‌ನಷ್ಟು ದೊಡ್ಡದಾದ ನಗರವನ್ನು ಕೆಲವೇ ನಿಮಿಷಗಳಲ್ಲಿ ಬೂದಿ ಮಾಡಬಹುದಾದ ಹೈಡ್ರೋಜನ್ ಬಾಂಬುಗಳ, ಅಣ್ವಸ್ತ್ರಗಳ, ಕ್ಷಣಾರ್ಧದಲ್ಲಿ ಸಿಡಿಯುವ ಕ್ಷಿಪಣಿಗಳಿಂದ, ಸರಿಸಾಟಿಯಿಲ್ಲದ ಮಿಸೈಲ್ಗಳಿಂದ ದಂಡೆತ್ತಿ ಭೂಮಿಯನ್ನೂ, ಸಾಗರವನ್ನೂ ಗಡಿಯಿಟ್ಟು ಅದರ ಅಧಿಕಾರವನ್ನೂ ಸಂಪತ್ತನ್ನೂ ಹಂಚಿಕೊಂಡ, ಕಿತ್ತುಕೊಂಡ ಮನುಷ್ಯ.. ಬಂದೂಕು ನಳಿಕೆಯ ತುದಿಯಲ್ಲಿ ಬಲಹೀನರ ಮೇಲೆ ಪಾರಮ್ಯ ಮೆರೆದ ಮನುಷ್ಯ.. ಕಪ್ಪಾದ ತನ್ನದೇ ಮನುಷ್ಯ ವರ್ಗವನ್ನು ಕಬ್ಬಿಣದ ಬೋನೊಳಗೆ ತುಂಬಿಸಿ ಟಿಕೆಟ್ ದರವಿಟ್ಟು ಮನೋರಂಜನೆ ಹೆಸರಲ್ಲಿ ವರ್ಣ ಶ್ರೇಷ್ಠತೆ ಮೆರೆದ ವಿಕೃತ ಹುಮ್ಮಸ್ಸಿನ ಹೀನ ಮನುಷ್ಯ.. ಎಲ್ಲಡಗಿ ಹೋಯಿತು ನಿನ್ನ ಸೊಕ್ಕು? ಎಲ್ಲಿ ಸೋರಿ ಹೋಯಿತು ನಿನ್ನ ದಾರ್ಷ್ಠ್ಯತನ? ಎಲ್ಲಿ ಹೋಯಿತು ಪರ್ವತ ಪತಾಕೆಯ ಮೇಲೂ ಹೂಂಕರಿಸುವ ನಿನ್ನ ಸಿಂಹಾಸನ ?. ಜಗತ್ತನ್ನೇ ಗೆಲ್ಲುತ್ತೇನೆ ಎನ್ನುವ ನಿನ್ನ ದರ್ಪ ಎಲ್ಲಿ ಸೊಲ್ಲಡಗಿ ಹೋಯಿತು ?. ನಿನ್ನ ಹಿಂಬಾಲಕ ಪಡೆಯೊಂದಿಗೆ ನೀ ಕಟ್ಟಿದ ಸೈನ್ಯ ಸಾಮ್ರಾಜ್ಯಗಳು ಎಲ್ಲಿ ಹೋಯಿತು? ನಿನ್ನ ಒಕ್ಕೂಟಗಳು ಮತ್ತು ಪ್ರತಿಷ್ಠಾನಗಳು ಏನಾದವು?. ನೆಲವನ್ನೂ, ಕಾಡನ್ನೂ, ಕಡಲನ್ನೂ ಬಗೆದು ನೀ ಸಾಧಿಸಿದ ಯಜಮಾನಿಕೆ ಇಂದು ನಿನ್ನ ಬಲಹೀನತೆಯ ಅಣಕವಾಯಿತೋ?.

ಓ ಮನುಷ್ಯಾ ! ಇದು ನಿನಗೊಂದು ಎಚ್ಚರಿಕೆಯ ಕರೆಗಂಟೆ. ನೀನು ಈ ಭೂಮಂಡಲದ ಸಹ ಜೀವಿಯೇ ಹೊರತು ಯಜಮಾನನಲ್ಲ. ಅಖಿಲಾಂಡಕೋಟಿ ಬ್ರಂಹಾಂಡದ ಚರಾಚರ ವಸ್ತುಜೀವ ಸಂಕುಲದಲ್ಲಿ ನೀನು ಒಂದು ಪ್ರಬೇಧ ಮಾತ್ರ. ಭೂಮಿಯ ಮೇಲೆ ನಿನಗಿರುವಷ್ಟೇ ಹಕ್ಕು ಆ ಇರುವೆಗಳಿಗೂ ಇದೆ, ಹಕ್ಕಿಗಳಿಗೂ ಇದೆ. ಪ್ರಕೃತಿಯ ಸಮತೋಲನ, ಜೈವಿಕ ವೈವಿಧ್ಯತೆ ಮತ್ತು ಅದರ ಸ್ಥಿರತೆ ಈ ಭೂಮಿಯ ಅಳಿವು ಉಳಿವನ್ನು ನಿರ್ಧರಿಸುತ್ತದೆ. ಕೊರೊನಾದಿಂದಾಗಿ ಕಂಗೆಟ್ಟು ನಿಂತಿರುವ ಇಟಲಿಯೊಳಗೆ ಪ್ರಕೃತಿ ನಳನಳಿಸಲು ಆರಂಭಿಸಿದೆ. ಸದಾ ಹಡಗು, ಕ್ರೂಸರ್ ಗಳಿಂದ ತುಂಬಿರುತ್ತಿದ್ದ ಸಾರ್ಡಿನಿಯಾ ಕಾಲುವೆಯಲ್ಲೀಗ ಡಾಲ್ಫಿನ್ ಗಳು ನರ್ತಿಸುತ್ತಿವೆ. ಪ್ರವಾಸಿಗರಿಂದ ಸದಾ ಗಿಜಿಗಿಡುತ್ತಿದ್ದ ಸಿಂಗಾಪುರ್ ನ ಸಮುದ್ರದಂಚಿನ ಬೀದಿಗಳು ಮತ್ತು ಬೀಚ್ ಗಳಲ್ಲಿ ನೀರು ನಾಯಿಗಳು ಸ್ವಚ್ಛಂದವಾಗಿ ತಿರುಗಾಡುತ್ತಿವೆ. ತಮ್ಮ ಮೂಲ ಹಾರಾಟ ಕೇಂದ್ರಗಳು ವಿಮಾನ ನಿಲ್ದಾಣಗಳಾಗಿ ಬದಲಾದ ಕಾರಣದಿಂದ ಏರ್ ಪೋರ್ಟ್ ಪ್ರದೇಶಗಳಲ್ಲಿ ಹಾರಾಟವನ್ನು ನಿಲ್ಲಿಸಿದ್ದ ಈಜಿಪ್ಟ್ ನ ಬಾತುಗಳು ಮರಳಿ ಅಲ್ಲೇ ಪ್ರತ್ಯಕ್ಷವಾಗಿವೆ. ವಿಮಾನ ಹಾರಾಟ ಸ್ಥಗಿತಗೊಂಡಿರುವ ಕಾರಣದಿಂದಾಗಿ ರನ್ ವೇ ನಲ್ಲಿ ಈಜಿಪ್ಟ್ ಬಾತುಗಳು ನಿರ್ಭೀತಿಯಿಂದ ಪರಿವಾರ ಸಮೇತವಾಗಿ ಓಡಾಡುವಂತಾಗಿದೆ. ಗಂಗಾ ನದಿ ಸ್ವಚ್ಛವಾಗುತ್ತಿದೆ. 200 ಕಿಲೋಮೀಟರ್ ದೂರಕ್ಕೆ ಹಿಮಾಲಯನ್ ಪರ್ವತಗಳು ಗೋಚರಿಸುವಷ್ಟು ಅಗಸ ಶುಭ್ರವಾಗಿದೆ.
ಒಟ್ಟಿನಲ್ಲಿ ಸಾರಾಂಶ ಇಷ್ಟೇ .. ಜಗತ್ತು ಒಂದು ನಿಯಮಕ್ಕೆ ಅಧೀನವಾಗಿದೆ. ಅದನ್ನು ಮೀರುವ ಅಧಿಕಾರ ಯಾರಿಗೂ ಇಲ್ಲ. ಈ ಅಲಿಖಿತ ನಿಯಮಗಳನ್ನು ಮನುಷ್ಯ ಮೀರಿರುವುದರ ಪರಿಣಾಮವಾಗಿಯೇ ಇದೆಲ್ಲವೂ ಸಂಭವಿಸುತ್ತಿವೆ. ಮನುಷ್ಯನ ಅತಿಕ್ರಮಣದಿಂದಾಗಿ ಪ್ರಾಣಿ-ಪಕ್ಷಿಗಳು ತಮ್ಮ ಮೂಲ ನೆಲೆಗಳಿಂದ ದೂರ ಸರಿದು ನಿಂತಿವೆ. ಇದನ್ನು ಹೇಳುವುದಕ್ಕಾಗಿಯೇ ಕೊರೋನಾ ಎಂಟ್ರಿಕೊಟ್ಟ ಹಾಗಿದೆ.

~ ಹುಸೇನಿ

ಅವಳು …

ಚಿತ್ರ ಕೃಪೆ : ಹಾರಿಸ್ ಖಾನ್

೧.
ಬಹುಮಹಡಿ ಮನೆಯಲ್ಲಿ
ಕಾಲಿಗೊಂದು ಕಾಲಾಳು,
ಕೋಣೆಗೊಂದು ಸೀಸಿ ಕ್ಯಾಮರಾ
ಅವಳು ಬಿಕ್ಕುವುದು ಮಾತ್ರ
ಗೋಡೆಗಷ್ಟೇ ತಿಳಿಯುತ್ತದೆ.

೨.
ಸೂರ್ಯ ಸರಿದರೂ ಮನೆ ಮುಟ್ಟದ
ಮಗಳು;
ಜಾಗರಣದ ಜಗತ್ತಿನಲ್ಲಿ ಅವಳಿಗೆ
ಸೂರ್ಯನ ಮೇಲೆ ಮುನಿಸು.

೩.
ಶಬ್ದವೇಧಿ ವಿದ್ಯೆಯ ವಿವರಿಸುತ್ತಿದ್ದ ಅವನು;
ಉಸಿರು ನಿಲ್ಲಿಸಿ
ತೊಟ್ಟಿಲಿನ ಉಸಿರನ್ನು ಆಲಿಸಿ
ನಿಟ್ಟುಸಿರಿಟ್ಟಳು ಅವಳು …

ಬಿಂದು-24

ಬದುಕಿಗಿಲ್ಲಿ ಸಾವಿನ ಹೆಸರು..
ಸಾವಿಗಿಲ್ಲಿ ಬದುಕಿನ ಹೆಸರು..
ಹುಟ್ಟು ಸಾವಿನ ಕವಲಿನಲಿ
ಕಂಗಾಲಾಗಿದ್ದೇನೆ ದೊರೆಯೇ
ಗಮ್ಯ ತೋರು; ಅನಂತತೆಯಲ್ಲಿ
ನಕ್ಷತ್ರವಾಗಿ ನಾನೂ ಹೊಳಯಬೇಕು…

~ ಹುಸೇನಿ

ಅಪೂರ್ಣ ಸಾಲುಗಳು .. 1

ಮತ್ತೆ ಏನೂ ಬರೆಯಲ್ಲ ಅಂತ ಪ್ರೀತಿಯಿಂದ ಬಯ್ಯುವ ನನ್ನ ಅಸಂಬದ್ಧ ಆಲಾಪಗಳ ಹಿರಿ/ಕಿರಿ ಗೆಳೆಯ ಗೆಳತಿಯರಲ್ಲಿ ಕ್ಷಮೆ ಕೇಳುತ್ತಾ …
ವರ್ಷಗಳ ಹಿಂದೆ ಎಂದೋ ಬರೆದಿಟ್ಟು ಮರೆತುಹೋದ ಅಪೂರ್ಣ ಸಾಲುಗಳು .. ಜನ್ಮಕ್ಕಂಟಿದ ಉದಾಸೀನತೆಯೋ, ಕ್ಷಣದ ನಂತರದ ಭಾವ-ಭಂಗತೆಯೋ ಕಾರಣವಾಗಿರಬಹುದಾದ ಈ ಅಪೂರ್ಣಸಾಲುಗಳಿಗೆ ಮುಕ್ತಿ ಕೊಡುತ್ತಿದ್ದೇನೆ 🙂

1.
ಮೋಡ ಮುಸುಕಿದ ಅರ್ಧ ಚಂದಿರ, ಮೈಚಾಚಿ ಮಲಗಿದ ರಸ್ತೆ, ಕರಿಮೋಡದಂಚಿನ ಮಿಂಚಿನಸೆಲೆ, ನಸುಕಿನಲ್ಲಿ ಬಿರಿಯಲಣಿಯಾಗುತ್ತಿರುವ ನೈದಿಲೆ ಮತ್ತು ಮೆಲ್ಲುಸಿರಿನ ಪಿಸುಮಾತಿನ ಜೊತೆ ನೀನು, ಎದೆಯ ತಿದಿಯಲ್ಲಿ ಗರ್ಭಗಟ್ಟಿದ ಕನಸುಗಳು ಈ ರಾತ್ರಿಯ ವಿಶೇಷಗಳು..

2.
ಹಲವು ರಾತ್ರಿಗಳು ನಿನ್ನ ರೂಪ ಪಡೆದು ದೇದೀಪ್ಯಮಾನವಾಗಿ ಹೊಳೆಯುತ್ತದೆ.. ಆ ರಾತ್ರಿಗಳಲ್ಲಿ ಹೊಸ ಹಾಡು, ಹೊಸ ಚೈತನ್ಯ, ಹೊಸ ಹಂಬಲಗಳೊಂದಿಗೆ ನನ್ನದು ಮರು ಹುಟ್ಟು…

3.
ಸಂಜೆಯಾಗುತ್ತದೆ
ಅವಳಂತಹದ್ದೇ ಸಂಜೆ
ಸಂಜೆಯಿಂದ ಅವಳ
ಅವಳಿಂದ ಸಂಜೆಯ
ಬೇರ್ಪಡಿಸುವ ಆಟಕ್ಕಿಳಿದವನಿಗೆ
ಎದೆ ಬಯಲಿನಲ್ಲಿ
ಇಬ್ಬನಿ ನಲಿಯುವ
ಮುಂಜಾನೆ ದೊರೆಯುತ್ತದೆ.
ಮತ್ತೆ ಸಂಜೆಯಾಗುವವರೆಗೂ
ಮುಗುಳ್ನಗಿಸುವ ಮುಂಜಾವು ದೊರೆಯುತ್ತದೆ.

4.
ಯಾ ರೂಹಿ…
ನೀನು ಅನಂತ ಗೋಲ;
ಅಖಂಡ ರಾಶಿ ತಾರೆಗಳ,ಕಾಯಗಳ,
ಗ್ರಹಗಳ ತುಂಬಿಕೊಂಡು
ನನ್ನೆದೆ ಬಾಂದಳದಿ ನಿಗೂಢವಾಗಿ
ಮಿನುಗುತ್ತಿದ್ದಾನೆ

5.
…..ಕೆಲವು ಬಂಧಗಳು ಹಾಗೆಯೇ ಅಲ್ಲೆಲ್ಲೋ ಮೀಟಿದ ತಂತಿಯ ನಾದದಿಂದ ಹೊಮ್ಮಿದ ರಾಗಕ್ಕೆ ಇಲ್ಲೆಲ್ಲೋ ಒಂದು ಹೃದಯ ತಲೆದೂಗುತ್ತದೆ. ಅಲ್ಲೆಲ್ಲೋ ಕಾಪಿಟ್ಟ ಮೋಡ ಇಲ್ಲಿ ಹನಿಯುತ್ತದೆ,ಮುಂಜಾನೆಯೊಂದು ಶುಭ ಹಾರೈಕೆ, ಮುಸ್ಸಂಜೆಯಲ್ಲೊಂದಿಷ್ಟು ಹರಟೆಗಳು, ರಾತ್ರಿಯ ನಿಶೀತತೆಯಲ್ಲಿ ಅಂತರಾಳದ ತಪನೆಗೊಂದಿಷ್ಟು ತಂಪುಕೊಡುವ ಮಾತುಕತೆಗಳು,ಇಷ್ಟಗಳನ್ನೂ ಕಷ್ಟಗಳನ್ನು ಹರವಿಕೊಂಡು ಬದುಕಿನ ಅರ್ಥ ಕಂಡುಕೊಳ್ಳುವ ಪ್ರಯತ್ನಗಳು. ಇಹದ ಭವ ಬಂಧಗಳಾಚೆಗಿನ ಖಾಲಿ ಅವಕಾಶದಲ್ಲಿ ಮೂಡುವ ಆತ್ಮೀಯತೆ ಅದು. ಮನಸ್ಸಿಂದ ಮನಸ್ಸಿಗೆ ನಿಸ್ತಂತು ಸಂವಹನ ಅದು. ಬದುಕ ಪ್ರೀತಿ ಮತ್ತು ಬದುಕಿಗೆ ಸ್ಫೂರ್ತಿ ಎರಡನ್ನೂ ಬಸಿದು ಕೊಡುವ ಈ ಆತ್ಮೀಯತೆಗೆ ಮಿಗಿಲಾದ್ದು ಇಲ್ಲಿ ಇರುವುದಾದರೂ ಏನು… ?

~ಹುಸೇನಿ

ಸಂತ

ನೀರು ಕಾಣದ ನರಪೇತಲ ಶರೀರ,
ಮುಗುಳ್ನಕ್ಕು ಶತಮಾನಗಳು
ಕಳೆದಿರಬಹುದು,
ಸೂರ್ಯೋದಯಕ್ಕಿಂತಲೇ
ಮುಂಚೆ ಅವನು ಖಾಲಿ ತೂತು ಜೋಳಿಗೆಯೇರಿಸಿ
ಹೊರಡುತ್ತಾನೆ..
ಜಗತ್ತಿನ ಪಾಲಿಗವನು
ಆಯ್ದು ತಿನ್ನುವ ಕೊಳಕ;
ನನ್ನ ಪಾಲಿಗೆ
ಅಪರಿಚಿತ ಸಂತ…

೨)

ಅಲ್ಲಿ ಭಾರೀ ಭೂಕಂಪದ
ಅವಶೇಷದಡಿ ಎಲ್ಲರೂ
ತಮ್ಮ ತಮ್ಮ ವಸ್ತುಗಳ ಹುಡುಕುತ್ತಿದ್ದಾರೆ;
ಸಂತನೂ ಹುಡುಕುತ್ತಿದ್ದಾನೆ,
ರಾತ್ರಿ ಮಲಗುವ ಮುನ್ನ
ಆರಿಸಿಟ್ಟ ಹಣತೆಯ ಬೆಳಕ ..

~ಹುಸೇನಿ

Create a free website or blog at WordPress.com.

Up ↑

%d bloggers like this: