ಅಮ್ಮಂದಿರ ಕಥೆ · ಅಮ್ಮಾ.. · ಅವಳು · ಕಾಡುವ ಹನಿಗಳು · ನೆನಪಿನ ಹನಿ · ಹುಸೇನಿ_ಪದ್ಯಗಳು

ಅವಳು …

ಚಿತ್ರ ಕೃಪೆ : ಹಾರಿಸ್ ಖಾನ್

೧.
ಬಹುಮಹಡಿ ಮನೆಯಲ್ಲಿ
ಕಾಲಿಗೊಂದು ಕಾಲಾಳು,
ಕೋಣೆಗೊಂದು ಸೀಸಿ ಕ್ಯಾಮರಾ
ಅವಳು ಬಿಕ್ಕುವುದು ಮಾತ್ರ
ಗೋಡೆಗಷ್ಟೇ ತಿಳಿಯುತ್ತದೆ.

೨.
ಸೂರ್ಯ ಸರಿದರೂ ಮನೆ ಮುಟ್ಟದ
ಮಗಳು;
ಜಾಗರಣದ ಜಗತ್ತಿನಲ್ಲಿ ಅವಳಿಗೆ
ಸೂರ್ಯನ ಮೇಲೆ ಮುನಿಸು.

೩.
ಶಬ್ದವೇಧಿ ವಿದ್ಯೆಯ ವಿವರಿಸುತ್ತಿದ್ದ ಅವನು;
ಉಸಿರು ನಿಲ್ಲಿಸಿ
ತೊಟ್ಟಿಲಿನ ಉಸಿರನ್ನು ಆಲಿಸಿ
ನಿಟ್ಟುಸಿರಿಟ್ಟಳು ಅವಳು …

ಒಂದಷ್ಟು (ಅ)ಭಾವಗಳು -೧ · ಕಾಡುವ ಹನಿಗಳು · ಹುಸೇನಿ_ಪದ್ಯಗಳು

ಒಂದಷ್ಟು (ಅ)ಭಾವಗಳು -೧

1)
ನೀ ಗಾಢ ಮೌನಕ್ಕೆ ಜಾರಿದಾಗೆಲ್ಲ
ನನ್ನನ್ನು ಹಾಡುವಂತೆ ಭಾಸವಾಗುತ್ತದೆ;

2)
ಮನುಷ್ಯ ಕೋಟೆ ಕಟ್ಟಿ ಮುಂಬಾಗಿಲನ್ನೂ ಮುಚ್ಚಿ ನಿಶ್ಚಿಂತೆಯಿಂದಿದ್ದ,
ಗೋಡೆ-ಬಾಗಿಲಿನ ಹಂಗಿಲ್ಲದ ಸಾವು ಮನುಷ್ಯನ ಸೋಲಾಗಿಯೇ ಉಳಿಯಿತು;

3)
ಅಬ್ಬರದ ಬೆಳಕಿನ ಹಿಂದೆಬಿದ್ದ ಜಗತ್ತು ಕತ್ತಲೆಗೂ ಬೆಳಕನ್ನು ತೊಡಿಸಿತು,
ನಿನ್ನೊಳಗಿದ್ದ ಹಣತೆಯೊಂದು ಜಗದ ಕುಹುಕಕ್ಕಂಜಿ ಅಸುನೀಗಿತು;

4)
ಕೃತಕ ಬೆಳಕಿನ ಅಬ್ಬರಕೆ ಹೆದರಿದವನ ಕತ್ತಲು ಬಾಚಿ ತಬ್ಬಿಕೊಂಡಿತು,
ಕತ್ತಲು ಕತ್ತಲಲ್ಲ ಆತ್ಮದೊಡಲ ಬೆಳಕು..

ಹುಸೇನಿ ~

Leave a comment

ಹುಸೇನಿ ಪದ್ಯಗಳು – 38 · ಹುಸೇನಿ_ಪದ್ಯಗಳು

ಹುಸೇನಿ ಪದ್ಯಗಳು – 38

alone_beach_nenapina sanchi

೧)
ನಿನ್ನೆಲ್ಲಾ ನೆನಪ ಗುಡ್ಡ ಹಾಕಿ
ಬೆಂಕಿ ಹಚ್ಚಿದೆ, ಸುಟ್ಟು ಬೂದಿಯಾಗಿ
ಹೊಗೆ ಶ್ವಾಸದಲ್ಲಿ ಲೀನವಾಯ್ತು,
ನಾಳೆಯ ನನ್ನ ಉಸಿರಿಗೆ
ನಿನ್ನ ಗಂಧವಿರಬಹುದಾ .. ?

೨)
ನೀನಿಲ್ಲದೇ ಆ ತೀರ ಮೌನವಾಗಿತ್ತು.
ಮರಳನ್ನು ಮಾತನಾಡಿಸ ಹೊರಟೆ,
ಅವು ಶತಮಾನಗಳ
ನೀರಡಿಕೆಯಿಂದ ಬಳಲಿತ್ತು.

೩)
ನಿನ್ನ ಬದಲು ಆ ಕ್ಷಣದ
ನಿನ್ನ ಸ್ನಿಗ್ಧ ನಗುವಷ್ಟನ್ನೇ ತುಂಬಿಕೊಂಡೆ.
ಈ ಬದುಕು ಕಳೆಯಲು
ಅಷ್ಟೇ ಸಾಕೆನಿಸಿತು.

೪)
ಸಾವಿನ ಮನೆಯಲ್ಲಿ
ಅಗರಬತ್ತಿಯ ಸುವಾಸನೆ
ಮಂಕಾಗಿದ್ದ ಮುಖಗಳಲ್ಲಿ
ನವ ಚೈತನ್ಯ ತುಂಬುತ್ತಿದೆ..

ಹುಸೇನಿ ~

ಬಿರಿಯದ ಮೊಗ್ಗು · ಬಿರಿಯದ ಮೊಗ್ಗು - 16

ಬಿರಿಯದ ಮೊಗ್ಗು – 16

ಆ ಮುರಿದ ಕೊಳಲು, ಒಡೆದ ತಂತಿ
ಗೋರಿಯೊಳಗಿನ ಕನಸು, ಆ ತೀರದಲ್ಲಿ
ಇಂಗಿದ ಕಣ್ಣ ಹನಿ ..
ಕಳೆದ ನಿನ್ನೆ, ಇನ್ನೂ ಬಾರದ ನಾಳೆ,
ನಿನ್ನ ನೆನಪು ಕೈಬೀಸಿ ಕರೆದಾಗೆಲ್ಲ
ನೀರಾಗಿ, ನದಿಯಾಗಿ ಹರಿಯುತ್ತದೆ ನಿನ್ನೆಡೆಗೆಯೇ,
ಬದುಕಿನ ಎಲ್ಲ ಜಂಜಡವ ಮರೆತು..

ಹುಸೇನಿ ~

ಹುಸೇನಿ ಪದ್ಯಗಳು – 36 · ಹುಸೇನಿ_ಪದ್ಯಗಳು

ಹುಸೇನಿ ಪದ್ಯಗಳು – 36

last-leaf1

1)
ಕಿವಿಗೊಟ್ಟೆಯಾ…?
ಆ ಕಾನನದಿ ಮುದಿ ಮರದ ಕೊನೆಯ ತರಗೆಲೆ ಉದುರಿದ ಶಬ್ದ..
ಕಿವಿಗೊಟ್ಟೆಯಾ…?
ನನ್ನ ಎದೆ ಬಿರಿದ ಶಬ್ದ..

2)
ಅಬ್ಬಾ !
ಇನ್ನೆಷ್ಟು ಮಾತನಾಡಲಿ,
ಒಳಗುದಿ ನೀ ತಿಳಿಯಲೇ
ಇಲ್ಲ,
ಇನ್ನು ‘ಮೌನ’
ಪರ್ವ..

3)
ಬಾಲ್ಯದಲ್ಲಿ
ಮತ್ತೆ ಮತ್ತೆ ನನ್ನ ಎಡವಿ
ಬೀಳಿಸುತ್ತಿದ್ದ ಕಾಲು ದಾರಿ
ಕಲಿಸಿಕೊಟ್ಟದ್ದು
ಬಿದ್ದರೆ ಎದ್ದೇಳುವ ಛಲದ ಪಾಠ..

4)
ಇದು ನೀರಿಂಗದ ಒಣ
ಮರುಭೂಮಿ, ಸುಮ್ಮನೆ
ಹನಿಯದಿರು ಮಳೆಯೇ
ಪಾಚಿಗಟ್ಟಿ ಕೊಳೆತು ನಾರಬಹುದು!

5)
ಮುಗ್ಧವಾಗಿ ತಬ್ಬದಿರು
ಹೂವೇ
ನಾನು ಮುಳ್ಳು ಬೇಲಿ..

ಹುಸೇನಿ ~

Leave a comment

ಬಿಂದು · ಬಿಂದು – 17

ಬಿಂದು – 17

ಕೂಡಿಕೊಂಡ ಬಳಿಕ
ಕಳಚಿಕೊಳ್ಳಲೇಬೇಕಾದ
ನಿಯ್ಯತ್ತಿನ ಕವಲುಗಳ
ಹಾದಿಯಲಿ
ದಾರಿಯ ಬದಲು ಪಯಣವನ್ನು
ನೆಚ್ಚಿಕೊಂಡ
ಮುಸಾಫಿರ ನಾನು…

ಹುಸೇನಿ ~

ಬಿಂದು · ಬಿಂದು – 16

ಬಿಂದು – 16

ಗಾಳಿ, ನೀರು, ಬೆಳಕು
ಉಚಿತವಾಗಿರುವ ಜಗತ್ತಿನಲ್ಲಿ
ಬದುಕುವುದನ್ನು ದುಸ್ತರ ಮಾಡಿಕೊಂಡ
ಮನುಷ್ಯ
ಇನ್ನೊಬ್ಬರಿಗೆ ಬದುಕುವ
ಪಾಠವನ್ನೂ ಹೇಳಿಕೊಡುತ್ತಾನೆ..

ಹುಸೇನಿ ~

Leave a comment

"ಹನಿ" ಮತ್ತು "ಮುತ್ತು"ಗಳು · ಹುಸೇನಿ ಪದ್ಯಗಳು - 31 · ಹುಸೇನಿ_ಪದ್ಯಗಳು

“ಹನಿ” ಮತ್ತು “ಮುತ್ತು”ಗಳು (ಹುಸೇನಿ ಪದ್ಯಗಳು – 31)

dewDrop

ಕವಿತೆಯಾಗದ ನನ್ನ
“ಹನಿ”ಗಳು ನಿನ್ನೊಡಲು
ಸೇರಿದಾಗ ಮುತ್ತಾಗುವ
ಗುಟ್ಟೇನು ಗೆಳತೀ … ?

ಸಾಗರಕ್ಕೆ ಬಿದ್ದ “ಹನಿ”
ಅಸ್ತಿತ್ವ ಕಳಕೊಂಡಿತು.
ಹೂವಿನ ಎಸಳ ಮೇಲೆ
ಬಿದ್ದವು, ಮುತ್ತಾಗಿ ಹೊಳೆಯಿತು.

ನಿನ್ನ ನೆನಪುಗಳ
ಪೋಣಿಸಿ ಬರೆದ
“ಹನಿ”ಯ ನೀ ಮೆಚ್ಚಿ ಮುತ್ತಿಟ್ಟೆ
ನೋಡು, ಅದಕ್ಕೀಗ ವಯ್ಯಾರ…!

~ಹುಸೇನಿ

ಕಾಡುವ ಹನಿಗಳು -೧೧ · ಹುಸೇನಿ ಪದ್ಯಗಳು - 13 · ಹುಸೇನಿ_ಪದ್ಯಗಳು

ಹುಸೇನಿ ಪದ್ಯಗಳು – 13

Roses-for-a-lost-love-a29108270

೧.
ನೆನಪಿನ ಪುಟಗಳಲ್ಲಿ ಅಡರಿ ಬಿದ್ದ
ನಿನ್ನೆಗಳಲ್ಲಿ ನನ್ನ ಪ್ರಣಯಕ್ಕೆ
ನಿನ್ನ ರೂಪವಿತ್ತು..
ಇಂದು ನನ್ನ ವಿರಹಕ್ಕೂ…!
೨.
ದುಃಖ ಸತ್ಯಗಳು
ನನ್ನ ನೋಡಿ
ನಗುತಿದೆ;
ದುಃಖ ಮರೆಯಲು
ನಾನೂ..! 

೩.
‘ಯಾಕಾಗಿ ನೀನನ್ನ ಉಪೇಕ್ಷಿಸಿದ್ದು?’
ಕೇಳಿತು ಕಣ್ಣೀರ ಹನಿ … ಕಣ್ಣಲ್ಲಿ.
‘ನಾನನುಭವಿಸುವ ನೋವು ನಿನಗೆ ತಿಳಿಯದಿರಲು..!’
ಉತ್ತರಿಸಿತು ಕಣ್ಣು.

೪.
ಎಲೆಗಳು ಪರಸ್ಪರ ತಾಕದಿರಲು
ದೂರ ದೂರದಲಿ ನೆಟ್ಟ
ಮರದ ಬೇರುಗಳು
ಭೂಗರ್ಭದಲಿ ಬಿಗಿದಪ್ಪಿದವು..!


ಹೇಗಿದೆ ಹೇಳಿ