ನ್ಯಾನೋ ಕಥೆಗಳು

ಧರ್ಮ ಮತ್ತು ಇತರೆ ನ್ಯಾನೋ ಕತೆಗಳು

flat,550x550,075,f
ಧರ್ಮ
ಅದೊಂದು ಊರು. ಸ್ವಯಂ ಘೋಷಿತ ಧರ್ಮ ರಕ್ಷಕರು ಅಕ್ರಮ ಗೋವು ಸಾಗಾಟವನ್ನು ತಡೆಯಲು ಆ ರಾತ್ರಿ ಕಾದು ಕುಳಿತು ಕೊನೆಗೊಂದು ಗೋವನ್ನು ಸಾಗಿಸುತ್ತಿದ್ದ ವಾಹನವನ್ನು ಹಿಡಿದು ಅದರಲ್ಲಿದ್ದವರಿಗೆ ಬಡಿದು ಧರ್ಮ ರಕ್ಷಣೆ ಮಾಡಿದರೆಂದು ಬೀಗಿದರು.
ಅದೇ ಊರಲ್ಲಿದ್ದ ಆಸ್ಪತ್ರೆಯಲ್ಲಿ ಅದೇ ರಾತ್ರಿ ಎರಡು ಭ್ರೂಣಗಳ ಹತ್ಯೆಯಾಯ್ತು. ಜೊತೆಗೆ ಮನುಷ್ಯ ಧರ್ಮವೂ.

ಅಭಿಪ್ರಾಯ
ಕೈಗೊಂದಿಷ್ಟು ಚೈನು, ಕಿವಿಯಲ್ಲಿ ಟಿಕ್ಕಿ, ಸೊಂಟದಿಂದ ಕೆಳಗೆ ಜಾರಿಬಿದ್ದ ಪ್ಯಾಂಟ್’ನ ಮೇಲ್ಭಾಗದಲ್ಲಿ ಪ್ರದರ್ಶನಕ್ಕಿಟ್ಟಂತೆ ಕಾಣುತ್ತಿದ್ದ ಒಳ ಉಡುಪು, ಆಕಾಶಕ್ಕೆ ಬಾಣ ಬಿಟ್ಟಂತೆ ಕೂದಲು ಬಿಟ್ಟಿದ್ದ ‘ನಮ್ಮತನ’ ಕಳೆದುಕೊಂಡ ನಮ್ಮ ದೇಶದ ಮುಂದಿನ ಭವಿಷ್ಯವಾದ ಯುವಕನೊಬ್ಬ ಅಂಗಡಿಯೊಂದಕ್ಕೆ ಹೊಕ್ಕವನೇ ದಿನ ಪತ್ರಿಕೆಯನ್ನು ಕೈಗೆತ್ತಿ ಓದಲು ಶುರುವಿಟ್ಟ.
“ಅಪ್ರಾಪ್ತೆಯ ಮೇಲೆ ಶೌಚಾಲಯದಲ್ಲಿ ಅತ್ಯಾಚಾರ” ಎಂಬ ತಲೆಬರಹ ಓದಿದವನೇ ರೊಚ್ಚಿಗೆದ್ದ..”ಛೆ! ಶೌಚಾಲಯದಲ್ಲಾ..?” ಅಲ್ಲಿದ್ದವರೆಲ್ಲ ಅವನನ್ನು ದುರುಗುಟ್ಟಿದಾಗ ಅವನು ತನ್ನ ಹೇಳಿಕೆಯನ್ನು ಬದಲಾಯಿಸಿದ.
“ಛೆ! ಪಾಪಿಗಳು ವಯಸ್ಸಿಗೆ ಬರದ ಹುಡುಗಿಯನ್ನೂ ಬಿಟ್ಟಿಲ್ಲ…!”

ಪರೀಕ್ಷೆ
ಅವನದು ಮೇರು ವ್ಯಕ್ತಿತ್ವ. ಅವನ ಯೋಚನೆಗಳು ಆಕಾಶದಷ್ಟು ದೊಡ್ಡಗಾಗಿದ್ದವು. ಅವನ ಹೃದಯ ಕಡಲಷ್ಟು ವಿಶಾಲವಾಗಿತ್ತು. ಅವನ ಭಾವನೆಗಳಿಗೆ ರೆಕ್ಕೆ ಪುಕ್ಕಗಳಿದ್ದವು. ಪ್ರಪಂಚದ ಆಗು ಹೋಗುಗಳ ಸ್ಪಷ್ಟ ಮಾಹಿತಿ ಅವನಲ್ಲಿತ್ತು. ಇಷ್ಟೆಲ್ಲಾ ಆಗಿದ್ದರೂ ಆ ಕೂಗು ಅವನನ್ನು ಬೆಚ್ಚು ಬೀಳಿಸಿತು.
“ಹೇಯ್ .. ಓದ್ಲಿಕ್ಕೆ ಕೂತ್ಕೊಂಕು ಅದೇನು ಬಾಯಿ ಬಿಟ್ಕೊಂಡು ಯೋಚನೆ ಮಾಡ್ತಿದ್ದೀಯ..? ನಾಳೆ ಪರೀಕ್ಷೆ ಅಂತ ಗೊತ್ತಿಲ್ವಾ ..?!”

ಬೆರಳು
“ಥೂ ದರಿದ್ರವಾಸಿ.. ಬದುಕೋ ಯೋಗ್ಯತೆ ಇಲ್ಲ ನಿಂಗೆ.. ಭೂಮಿಗೆ ಭಾರವಾಗಿ ಬದುಕೋದಕ್ಕಿಂಥ ಸಾಯುವುದು ಲೇಸು”. ಆತ ಒಂದು ಬೆರಳನ್ನು ಅವನೆಡೆಗೆ ತೋರಿಸಿ ಬಾಯಿಗೆ ಬಂದಂತೆ ಬೈತಿದ್ದ.
ಅವನ ಉಳಿದ ಮೂರು ಬೆರಳುಗಳು ಅವನನ್ನೇ ತೋರಿಸುತ್ತಿತ್ತು.


Leave a Comment

ನ್ಯಾನೋ ಕಥೆಗಳು

ಒಂದಿಷ್ಟು ನ್ಯಾನೋ ಕತೆಗಳು

lathi_charge_2
ಹರಾಜು
ಡೆಲ್ಲಿಯ ರಾಜಬೀದಿಗಳಲ್ಲಿ ಮುಂದಿನ ವಾರ ನಡೆಯುವ ಜಗತ್ತಿನ ಅತ್ಯಂತ ಬೆಳೆಬಾಳುವ ವಸ್ತುಗಳ ಹರಾಜಿನ ಬಗ್ಗೆ ಅಲ್ಲಲ್ಲಿ ದೊಡ್ಡ ದೊಡ್ಡ ಪೋಸ್ಟರ್ ಸ್ಥಾಪಿಸಲಾಗಿತ್ತು. ಅದನ್ನು ನೋಡುತ್ತಿದ್ದ ಹಿರಿಯರೊಬ್ಬರು ನಿಟ್ಟುಸಿರು ಬಿಡುತ್ತಾ ಹೇಳಿದರು .
“ಅತ್ಯಂತ ಬೆಲೆಬಾಳುವ ವಸ್ತು ಕಳೆದ ವಾರವೇ ಹರಾಜಾಗಿದೆ… ಹೆಣ್ಣಿನ ಮಾನಕ್ಕಿಂತ ಬೆಲೆಬಾಳುವ ಅದು ಯಾವ ವಸ್ತುವನ್ನು ಹರಾಜಿಗಿಡುತ್ತಾರೋ …?”

ಫ್ಲಾಟ್
“ಅಲ್ಲಿ ಸ್ವಿಮ್ಮಿಂಗ್ ಪೂಲ್ ಇಲ್ಲ , ಜಿಮ್ ಇಲ್ಲ, ಮಸಾಜ್ ಸೆಂಟರ್ ಇಲ್ಲ, ಟೆನಿಸ್ ಗ್ರೌಂಡ್ ಇಲ್ಲ . ಆ ಅಪಾರ್ಟ್ಮೆಂಟಲ್ಲಿ ನಮಗೆ ಫ್ಲಾಟ್ ಬೇಡ..” ಹೊಸ ಮನೆಯ ಖರೀದಿಯ ಸನ್ನಾಹದಲ್ಲಿದ್ದ ಗಂಡನಲ್ಲಿ ಹೆಂಡತಿ ಜಗಳ ಕಾಯುತ್ತಿದ್ದಳು.
ಸೋರುತ್ತಿರುವ ಶೀಟ್ ಮಾಡು, ಮುರಿದಿರುವ ಬಾಗಿಲು, ಜರಿದಿರುವ ಗೋಡೆ , ಹೊಟ್ಟೆಗೆ ಅನ್ನವಿಲ್ಲದ ತನ್ನ ಬಾಲ್ಯಕಾಲ ಆತನ ಕಣ್ಣಮುಂದೆ ಬಂದು ಅಣಕವಾಡುತ್ತಾ ನಿಂತಿತು.

ಯೋಜನೆ
ಯುವಕರ ಭವಿಷ್ಯವನ್ನು ಉತ್ತಮಗೊಳಿಸುವ ಪದ್ದತಿಯನ್ನು ನಮ್ಮ ಸರಕಾರ ಹಾಕಿಕೊಂಡಿದೆ ಅಂತ ಭಾಷಣ ಬಿಗಿದಿದ್ದ ಆ ಸಚಿವ ನ್ಯಾಯ ಕೇಳಿ ಬೀದಿಗಿಳಿದ ಯುವಕರ ಮೇಲೆ ಲಾಟಿ ಚಾರ್ಜ್ಗೆ ಆದೇಶ ಕೊಟ್ಟ .
ಕೊನೆಗೆ ಸತ್ತ ಯುವಕರಿಗೆ 10 ಲಕ್ಷ ಪರಿಹಾರ ಘೋಸಿಸಿ ತಾನು ಕೊಟ್ಟ ಮಾತನ್ನು ಪಾಲಿಸಿದ್ದೇನೆ ಅಂತ ಬೀಗಿದ.

ಸಾವು
ಬಾಡಿಗೆ ಹಂತಕನಿಗೆ ಗಲ್ಲು ಶಿಕ್ಷೆಯ ತೀರ್ಪು ಕೊಡಲಾಯ್ತು .ಆತ ಯಾವುದೇ ಅಳುಕಿಲ್ಲದೆ ಅದನ್ನ ಸ್ವೀಕರಿಸಿದ. ಅವನನ್ನು ಕರೆದುಕೊಂಡು ಹೋಗುತ್ತಿದ್ದ ಪೇದೆ ಆಶ್ಚರ್ಯದಿಂದ ಕೇಳಿದ “ನಿನಗೆ ಹೆದರಿಕೆ ಇಲ್ಲವೇ …?”
“ನಾನು ಎಷ್ಟು ಮಂದಿಯನ್ನು ಕೊಂದಿದ್ದೀನೋ ಅಷ್ಟು ಬಾರಿ ಅವರೊಂದಿಗೆ ನಾನೂ ಸತ್ತಿದ್ದೇನೆ. ಇನ್ನೊಮ್ಮೆ ಸಾಯಲು ನಾನೇಕೆ ಭಯಪಡಲಿ…?” ಆತನ ಮಾತಲ್ಲೂ ಎಳ್ಳಷ್ಟು ಅಳುಕಿರಲಿಲ್ಲ.


Leave a Comment

ನ್ಯಾನೋ ಕಥೆಗಳು

ಭಕ್ತಿ ಮತ್ತು ಇತರೆ ನ್ಯಾನೋ ಕತೆಗಳು

6
ದತ್ತು
ಮಕ್ಕಳಿಲ್ಲದ ದಂಪತಿಗಳು ಮಗುವನ್ನು ದತ್ತು ಪಡೆಯಲು ಅನಾಥಾಲಯಕ್ಕೆ ಬಂದಿದ್ದರು. ಅವರು ತಂದಿದ್ದ ಪತ್ರಗಳನ್ನೆಲ್ಲ ಪರಿಶೀಲಿಸಿದ ಅಲ್ಲಿನ ಫಾದರ್ ‘ನಿಮಗೆ ಮಕ್ಕಳೇ ಆಗುವುದಿಲ್ಲವೆಂದು ಸಾಬೀತು ಪಡಿಸುವ ಸರ್ಟಿಫಿಕೇಟ್ ಇಲ್ಲದೆ ನಿಮಗೆ ಮಗುವನ್ನು ಕೊಡಲಾಗದು’ ಅಂತ ಹೇಳಿದರು. ಅವಳು ಅವನ ಮುಖ ನೋಡುವಷ್ಟರಲ್ಲಿ ಅವನು ಇಲ್ಲೂ ತಲೆ ತಗ್ಗಿಸಿದ್ದ.

ಜಾಹೀರಾತು
ಗುಟ್ಕಾ ಸೇವನೆಯ ವಿರುದ್ದ ಯುವಕರಲ್ಲಿ ಜಾಗೃತಿ ಮೂಡಿಸಲು, ಗಂಟಲು ಕ್ಯಾನ್ಸರಿಂದ ಸತ್ತ ಯುವಕನ ಫೋಟೋ ಇರುವ ಜಾಹೀರಾತು ಫಲಕವನ್ನು ನಗರದ ಬಸ್ ಸ್ಟಾಪಿನಲ್ಲಿ ಸ್ಥಾಪಿಸಿದ್ದರು. ಅದೇ ದಾರಿಯಲ್ಲಿ ಪ್ರಯಾಣಿಸುತ್ತಿದ್ದ ಆ ಯುವಕನ ತಂದೆಯ ಪಾಲಿಗೆ ಅವರ ಮಗ ಪ್ರತೀ ದಿನ ಸಾಯುತ್ತಿದ್ದ.

ಭಕ್ತಿ
ಮದುವೆಯಾಗಿ ವರ್ಷಗಳಾದರೂ ಮಗುವಾಗದ್ದರಿಂದ ಅವಳು ಗಂಡನ ಜೊತೆ ದೇವಸ್ಥಾನಕ್ಕೆ ಹೋಗಿ ಪೂಜೆ ಮಾಡುವ ಹರಕೆ ಹೊತ್ತಿದ್ದಳು. ಗಂಡ ದೇವಸ್ಥಾನಕ್ಕೆ ಹೊರಡಲು ಒಪ್ಪದಿದ್ದಾಗ ಆಕೆ ಆತನನ್ನು ದೂಶಿಸತೊಡಗಿದಳು.
“ದೇವರ ಮೇಲೆ ಭಯ ಭಕ್ತಿ ಇದ್ದರೆ ತಾನೇ ದೇವಸ್ಥಾನ, ಪೂಜೆ. ನೀವು ನಾಸ್ತಿಕರು, ಆ ದೇವರ ಮೇಲೆ ನಿಮಗೆ ಸ್ವಲ್ಪನೂ ಭಕ್ತಿ ಇಲ್ಲ”. “ಹೌದು ..ನಮ್ಮ ಕಾರ್ಯ ಸಾಧನೆಗೆ ದೇವರಲ್ಲಿ ಕರಾರು ಮಾಡುವಂಥಹ ಭಕ್ತಿ ನನ್ನಲ್ಲಿಲ್ಲ” . ಆತನೆಂದ.

ಸಾವು
ಪ್ರೀತಿಸಿ ದೂರವಾಗಿದ್ದ ಅವಳು ಅಚಾನಕ್ಕಾಗಿ ಸಿಕ್ಕಿದವಳೇ “ಜೀವಂತವಾಗಿದ್ದೀಯಾ ..?” ಅಂತ ಕೇಳಬೇಕೆಂದುಕೊಂಡ . ತಟ್ಟನೆ ಅವನಿಗೆ ನೆನಪಾಯ್ತು .. ಸತ್ತದ್ದು ಅವನೇ ಎಂದು ..ಅವಳ ಹೃದಯದಲ್ಲಿ.

ಅಣಕ
ಜೀವನಲ್ಲಿ ಜುಗುಪ್ಸೆಗೊಂಡ ಅವನು ಕೊನೆಗೊಂದು ದಿನ ಮನೆ, ಹೆಂಡತಿ ಮತ್ತು ತನ್ನೆರಡು ಪುಟ್ಟ ಮಕ್ಕಳನ್ನು ತೊರೆದು ದೂರದ ಹಿಮಾಲಯಕ್ಕೆ ಹೊರಟಿದ್ದ. ದಾರಿಯಲ್ಲಿ ಆಲದ ಮರದ ಪುಟ್ಟ ಗೂಡಿನಲ್ಲಿದ್ದ ಹಕ್ಕಿಯೊಂದು ತನ್ನ ಮರಿಗಳ ಬಾಯಿಗೆ ತುತ್ತನ್ನಿಕ್ಕುವುದನ್ನು ನೋಡಿದ ಅವನಿಗದು ತನ್ನನ್ನು ಅಣಕಿಸಿದಂತೆ ಕಂಡಿತು.

ಕನ್ನಡ ಬ್ಲಾಗಲ್ಲಿ ಓದಲು ಇಲ್ಲಿ ಕ್ಲಿಕ್ಕಿಸಿ


Leave a Comment

ನ್ಯಾನೋ ಕಥೆಗಳು

ವ್ಯತ್ಯಾಸ ಮತ್ತು ಇತರೆ ನ್ಯಾನೋ ಕತೆಗಳು


ನೀನಿಲ್ಲದೆಯೂ
ಈ ಜಗತ್ತಿನಲ್ಲಿ ಎಲ್ಲದಕ್ಕಿಂತ ಮಿಗಿಲಾಗಿ ಆತ ಹೆಂಡತಿಯನ್ನು ಪ್ರೀತಿಸುತ್ತಿದ್ದ. ತನ್ನ ಸರ್ವಸ್ವವನ್ನೂ ಅವಳಿಗೆ ಮುಡಿಪಾಗಿಟ್ಟಿದ್ದ. ಅವಳಿಲ್ಲದ ಒಂದು ದಿನವನ್ನು ಅವನಿಂದ ಕಲ್ಪಿಸಲೂ ಆಗುತ್ತಿರಲಿಲ್ಲ .
ಅದೊಂದು ದಿನ ಅವಳು ಮಾತಿನ ನಡುವೆ “ನೀನಿಲ್ಲದೆಯೂ ಬದುಕಬಲ್ಲೆ”.. ಎಂದಿದ್ದಳು.
ಮರುದಿನ ಆತ ಹೆಣವಾಗಿದ್ದ.

ಸಾಧನೆ
ಆ ತಂದೆಗೆ ಚಿಕ್ಕ ಪ್ರಾಯದ ತನ್ನ ಮಗನ ಬದುಕಿನ ಬಗ್ಗೆ ಅಗಾದ ಕನಸಿತ್ತು . ತನ್ನ ಮಗನ ಸಾಧನೆಯಲ್ಲಿ ಅಭಿಮಾನ ಹೊಂದಿದ್ದ ತಂದೆ, ಮಗನಿಂದ ಇನ್ನಷ್ಟು ಸಾಧನೆಯನ್ನು ನಿರೀಕ್ಷಿಸುತ್ತಿದ್ದರು. ಆದರೆ ವಿಧಿಯ ಆಟ ಬೇರೆಯಾಗಿತ್ತು, ಮಗನ ಅಕಾಲ ಮರಣ ಆತನನ್ನು ಕಂಗಾಲು ಮಾಡಿತ್ತು .
ಕೆಲ ದಿನಗಳ ನಂತರ ಅವನಿಗೆ ಚಿಕಿತ್ಸೆ ಕೊಟ್ಟ ಆಸ್ಪತ್ರೆಯಿಂದ ಡಾಕ್ಟರ್ ಕರೆಮಾಡಿದ್ದರು “ನಿಮ್ಮ ಮಗ ದಾನ ಮಾಡಿದ್ದ ಕಣ್ಣುಗಳಿಂದ ಇವತ್ತು ಇಬ್ಬರಿಗೆ ದೃಷ್ಟಿ ಕೊಟ್ಟೆ !”.
ತಂದೆ ತುಂಬು ಅಭಿಮಾನದಿಂದ ತೂಗು ಹಾಕಿದ ಮಗನ ಫೋಟೋವನ್ನೊಮ್ಮೆ ದಿಟ್ಟಿಸಿದರು. .

ಸತ್ತ ಮನುಷ್ಯ
ಒಂದೇ ಕುಟುಂಬದ ಮೂವರನ್ನು ಕೊಂದಿದ್ದ ಆಗಂತುಕನನ್ನು ಪೊಲೀಸರು ವಿಚಾರಣೆ ನಡೆಸುತ್ತಿದ್ದರು. ಆತನೇ ವರ್ತನೆಯಲ್ಲಿ ಯಾವುದೇ ಪಶ್ಚಾತಾಪ ಭಾವವಿರಲಿಲ್ಲ . ಎಳ್ಳಷ್ಟೂ ಅಳುಕಿಲ್ಲದ ಅವನನ್ನು ದಿಟ್ಟಿಸಿ ನೋಡಿದ ವಯಸ್ಸಾದ ಪೇದೆಯೊಬ್ಬನನ್ನು ಆತ ದಟ್ಟ ಸ್ವರದಲ್ಲಿ ಗದರಿಸುವಂತೆ ಕೇಳಿದ “ಏನನ್ನು ನೋಡ್ತಾ ಇದ್ದೀಯ..? ”
“ನಿನ್ನೊಳಗೆ ಸತ್ತಿರುವ ಮನುಷ್ಯನನ್ನು” ಪೇದೆ ಮಾರ್ಮಿಕವಾಗಿ ಉತ್ತರಿಸಿದ.

ವ್ಯತ್ಯಾಸ
ಅವರಿಬ್ಬರು ಊರಿನ ಆಗರ್ಭ ಶ್ರೀಮಂತರು . ಒಬ್ಬ ಕೊಡುಗೈ ದಾನಿಯಾಗಿದ್ದ. ಸಹಾಯ ಯಾಚಿಸಿ ಬಂದ ಯಾರನ್ನೂ ಆತ ಬರಿಗೈಯ್ಯಲ್ಲಿ ಕಳಿಸುತ್ತಿರಲಿಲ್ಲ. ಮತ್ತೊಬ್ಬ ಕಡು ಜಿಪುನನಾಗಿದ್ದ. ಯಾರಿಗೂ ನಯಾಪೈಸೆ ದಾನ ಮಾಡಿದವನಲ್ಲ. ಕೊನೆಗೆ ಇಬ್ಬರೂ ಸತ್ತು ಹೋದರು.
ವ್ಯತ್ಯಾಸ ಇಷ್ಟೇ, ಒಬ್ಬ ಸತ್ತು ಮಣ್ಣಾಗಿ ಹೋದ. ಮತ್ತೊಬ್ಬ ಸತ್ತೂ ಜನಮಾನಸದಲ್ಲಿ ಬದುಕಿಬಿಟ್ಟ.


Leave a Comment

ಕನ್ನಡ ಬ್ಲಾಗಿನಲ್ಲಿ ಓದಲು ಇಲ್ಲಿ ಕ್ಲಿಕ್ಕಿಸಿ

ನ್ಯಾನೋ ಕಥೆಗಳು, ಪವಾಡ ಮತ್ತು ಇತರ ನ್ಯಾನೋ ಕತೆಗಳು

ಪವಾಡ ಮತ್ತು ಇತರ ನ್ಯಾನೋ ಕತೆಗಳು

ಶತ್ರು
ಒಂದು ಹಕ್ಕಿ ಕನ್ನಡಿಯಲ್ಲಿ ತನ್ನ ಪ್ರತಿಬಿಂಬವನ್ನು ಕಂಡು ಅದನ್ನು ಕುಕ್ಕಲು ಶುರುವಿಟ್ಟಿತು. ತನ್ನ ಕೊಕ್ಕಿಗೆ ನೋವಾದರೂ ಅದು ಕುಕ್ಕುದನ್ನು ನಿಲ್ಲಿಸಲಿಲ್ಲ. ಕೊನೆಗೆ ತಣ್ಣಗಾಗಿ ಅದು ದೂರ ಹಾರಿ ಹೋಯ್ತು. ಮರು ದಿನವೂ ಇದೇ ಪುನರಾವರ್ತನೆ ಆಯಿತು. ತಾನು ಕುಕ್ಕುವುದು ತನ್ನ ಪ್ರತಿಬಿಂಬವನ್ನು ಅಂತ ಅದಕ್ಕೆ ತಿಳಿಯಲಿಲ್ಲ. ಕೊನೆಗೆ ತನ್ನಲ್ಲಿದ್ದ ಎಲ್ಲ ಶಕ್ತಿಯನ್ನು ಉಪಯೋಗಿಸಿ ಕುಕ್ಕಿದಾಗ ಕನ್ನಡಿ ಒಡೆದು ಚೂರಿ ಚೂರಾಯಿತು.ಈಗ ಅದರ ಪ್ರತಿಬಿಂಬ ನಾಲ್ಕಾಯ್ತು…. ಐದಾಯ್ತು. ಅದು ತನ್ನ ಶತ್ರುಗಳ ಸಂಖ್ಯೆ ಹೆಚ್ಚಾದುದು ಕಂಡು ಹೆದರಿ ದೂರಕ್ಕೆ ಹಾರಿ ಹೋಯ್ತು..
ಮನಷ್ಯನಿಗೆ ಶತ್ರುಗಳು ಹೆಚ್ಚಾಗುವುದು ಹೀಗೆಯೇ .. ಕತೆ ಮುಗಿಸಿದ ಸಂತ ದೀರ್ಘ ನಿಟ್ಟಿಸಿರು ಬಿಡುತ್ತಾ ಅದರ ತಾತ್ಪರ್ಯವನ್ನು ತನ್ನ ಶಿಷ್ಯಂದಿರ ಮುಂದಿಟ್ಟ .

ಪವಾಡ
ತನ್ನ ಪವಾಡದಿಂದ ದೇಶ ವಿದೇಶಗಳಿಂದ ಸಾವಿರಾರು ಭಕ್ತರನ್ನು ಹೊಂದಿದ್ದ ಸ್ವಾಮೀಜಿಯ ಆಸ್ಥಾನವದು. ಭಕ್ತರು ಒಬ್ಬೊಬ್ಬರಾಗಿ ತಮ್ಮ ಕಷ್ಟಗಳನ್ನು ಸ್ವಾಮೀಜಿ ಬಳಿ ನಿವೇದಿಸುತ್ತಿದ್ದರು. ಸ್ವಾಮೀಜಿ ತನ್ನ ಪವಾಡದಿಂದ ಗಾಳಿಯಿಂದ ಭಸ್ಮವನ್ನು ಸೃಷ್ಟಿಸಿ ಹಸನ್ಮುಖರಾಗಿ ಅವರಿಗೆ ಹಂಚುತ್ತಿದ್ದನು. ಭಕ್ತ ಸಮೂಹ ಅದನ್ನು ಅಷ್ಟೇ ಆದರದಿಂದ ಪಡೆದು ಧನ್ಯತೆಯ ಭಾವದಿಂದ ಹಿಂತಿರುಗುತ್ತಿದ್ದರು.
ಬರಗಾಲದಿಂದ ಕಂಗಾಲಾಗಿದ್ದ ರೈತನೊಬ್ಬ ಸ್ವಾಮೀಜಿ ಬಳಿ ಬಂದು ತನ್ನ ಕಷ್ಟಗಳನ್ನೆಲ್ಲ ಹೇಳಿಕೊಂಡನು.. ಸ್ವಾಮೀಜಿ ಎಂದಿನಂತೆ ಗಾಳಿಯಿಂದ ಭಸ್ಮವನ್ನು ತೆಗೆದು ಕೊಟ್ಟಾಗ ಅದನ್ನು ತಿರಸ್ಕರಿಸುತ್ತಾ ‘ ಬರದಿಂದ ಕಂಗಾಲಾದ ನನಗೆ ಬೇಕಾದುದು ಭಸ್ಮವಲ್ಲ, ಒಂದಿಷ್ಟು ಅಕ್ಕಿ ಮತ್ತು ಒಂದಿಷ್ಟು ಕಾಳುಗಳನ್ನು ತಾವು ಗಾಳಿಯಿಂದ ಸೃಷ್ಟಿಸಿ ಕೊಡಿ ..’ ನಯವಾಗಿ ರೈತನು ಬೇಡಿಕೆಯಿಟ್ಟನು.. ಸ್ವಾಮೀಜಿಯ ಮುಖದಲ್ಲಿದ್ದ ‘ಪ್ರಸನ್ನತೆ’ ಒಮ್ಮೆಲೇ ಮಾಯವಾಯ್ತು…

ನಾನು – ನೀನು
“ಪ್ರೀತಿ ಅಂದರೆ ಏನು ?” ಹಾಲು ಚೆಲ್ಲಿದ ಬೆಳದಿಂಗಳ ಬೆಳಕಿನಲ್ಲಿ ಆತನೊಂದಿಗಿದ್ದ ಅವಳು ಒಮ್ಮೆಲೇ ಪ್ರಶ್ನೆಯ ಬಾಣವನ್ನು ಛೂ ಬಿಟ್ಟಳು. ಪ್ರೀತಿಯೆಂದರೆ ಒಲವು , ವಿಶ್ವಾಸ, ಕಾಳಜಿ , ನವಿರು ಸ್ಪರ್ಶ , ಭಾವನೆಗಳು , ಕಾಮನೆಗಳ ಮಧುರ ಮಿಲನ ಆತ ಯೋಚಿಸುತ್ತ ಹೋದ, ಹೇಳಿದರೂ ಹೇಳಲಾಗದ ವಿವರಿಸಿದರೂ ವಿವರಿಸಲಾಗದ ವಿಚಿತ್ರ ವಿಕ್ಷಿಪ್ತ ವಿಸ್ಮಯವಾದ ಪ್ರೀತಿಯನ್ನು ಆತ ಪದಗಳಲ್ಲಿ ಕಟ್ಟಿ ಹಾಕಲು ಹೋಗಿ ಕೊನೆಗೆ ಸೋಲೊಪ್ಪಿ ಮೆಲ್ಲನೆ ಉಸಿರಿದ ” ಏನಿಲ್ಲ ಹುಡುಗಿ , ಪ್ರೀತಿಯೆಂದರೆ ಬರಿ ನಾನು ನೀನು…!”

ಕಾಗೆಗಳು
ನಡೆದು ಸುಸ್ತಾದ ಅವನು ಒಂದು ಕಲ್ಲಿನ ಮೇಲೆ ಕೂತ. ದೂರದಲ್ಲಿ ಕಾಗೆಗಳು ಏನನ್ನೋ ಕುಕ್ಕಿ ಎಳೆಯುತ್ತಿದೆ. ಜೊತೆ ಜೊತೆಗೆ ಆ ಕಾಗೆಗಳು ಇನ್ನಿತರ ಕಾಗೆಗಳನ್ನು ಕೂಗಿ ಕರೆಯುತ್ತಿವೆ. ಅವನು ಅಲ್ಲಿಂದ ಎದ್ದು ನಡೆದ. ಅವನ ಗೆಳೆಯನೊಬ್ಬ ಆವರೆಗೂ ಅವನ ಜೊತೆಗೆ ಇದ್ದ. ಅಲ್ಲಿಂದ ಮತ್ತೆ ಅವರು ಎರಡು ದಾರಿಯಲ್ಲಿ ಹೊರಟರು. ನಡೆದು ಕ್ಷೀಣಿಸಿದ ಅವನು ಹೋಟೆಲನ್ನು ಕಂಡದ್ದೇ ಅದರೊಳಗೆ ಹೊಕ್ಕ . ಹೊಟ್ಟೆ ತುಂಬಾ ತಿಂದು ತೇಗು ಬಿಡುತ್ತ ಹೊರಬರುತ್ತಿದ್ದಂತೆ ಅವನಿಗೆ ತನ್ನ ಗೆಳೆಯನ ನೆನಪಾಯ್ತು… “ಅವನೀಗ ಹಸಿದು ಕಂಗಾಲಾಗಿ ನಡೆಯುತ್ತಿರಬಹುದೇನೋ…?!”

ಕಾಡು
ತಾನು ಕಾಡೊಳಗೆ ಸಿಕ್ಕಿ ಹಾಕಿಕೊಂಡಿದ್ದೇನೆ ಅಂತ ಸಿಂಹಕ್ಕೆ ತಟ್ಟನೆ ಗೊತ್ತಾಯ್ತು, ಸುತ್ತಲು ದಟ್ಟವಾದ ಕಾಡು. ಅಲ್ಲಿ ಓಡುತ್ತಿರುವ ಯಾವುದೋ ವಿಚಿತ್ರ ಜೀವಿಗಳು (ಮನುಷ್ಯರು ಮತ್ತು ವಾಹನಗಳು) . ತಾನು ಸೂಕ್ಹ್ಮವಾಗಿ ಗಮನಿಸಿ ನಡೆಯದಿದ್ದರೆ ತನ್ನ ಜೀವಕ್ಕೆ ಆಪತ್ತು ಎಂದು ಅವನಿಗೆ ತಿಳಿಯಿತು. ಅವನು ಅವರ ಕಣ್ಣಿಗೆ ಬೀಳದಂತೆ ಮೆಲ್ಲ ಮೆಲ್ಲನೆ ಹೆಜ್ಜೆಯಿಟ್ಟ. ಆದರೂ ಅದ್ಯಾವುದೋ ಕ್ಷಣದಲ್ಲಿ ಅವರ ಕಣ್ಣಿಗೆ ಬಿದ್ದ. ತೂರಿ ಬಂದ ಅವರ ಆಯುಧ (ಗುಂಡು) ಅವನನ್ನು ನೆಲಕ್ಕೆ ಅಪ್ಪಳಿಸಿತು. ಅವನ ಕೊನೆಯ ಘರ್ಜನೆಯಲ್ಲಿ ರಾಜ ಗಾಂಭೀರ್ಯವಿತ್ತು. ಆದರೆ ಆ “ಕಾಂಕ್ರೀಟ್ ಕಾಡಿನಲ್ಲಿ” ಅದನ್ನು ಯಾರು ತಾನೆ ಕೇಳಿಯಾರು….?

ಚಿತ್ರಕೃಪೆ : ಅಂತರ್ಜಾಲ


Leave comments

ಕನ್ನಡ ಬ್ಲಾಗಿನಲ್ಲಿ ಓದಲು ಇಲ್ಲಿ ಕ್ಲಿಕ್ಕಿಸಿ

ನ್ಯಾನೋ ಕಥೆಗಳು

ಮಗದಷ್ಟು ನ್ಯಾನೋ ಕತೆಗಳು


ಕೊರತೆ
ಒಂದು ಕಾಲದಲ್ಲಿ ಅವರಿಬ್ಬರೂ ಕಿತ್ತು ತಿನ್ನುವ ಬಡತನದಿಂದ ಕಾಲ ಕಳೆಯಿತ್ತಿದ್ದರು.. ನಾನು ನಿನಗೆ , ನೀನು ನನಗೆ ಅಂತಿದ್ದ ಅವರ ಮನೆಯಲ್ಲಿ ಈಗ ಕೈ ಕಾಲಿಗೊಂದು ಕೆಲಸದಾಳು.. ತನ್ನ ಹಳೆಯ ನೆನಪುಗಳನ್ನೆಲ್ಲ ಮೆಲುಕು ಹಾಕಿ ಮರುಗುತ್ತಿದ್ದ ಅವನಲ್ಲಿ ಅದೊಮ್ಮೆ ಅವಳು ಕೇಳಿದಳು.. ನಿಮಗೇನಿದೆ ಇಲ್ಲಿ ಕೊರತೆ..? ಆತ ನಿಟ್ಟುಸಿರಿಡುತ್ತಾ ಉತ್ತರಿಸಿದ.. “ನಿನ್ನ ಪ್ರೀತಿ ಮತ್ತು ಅಕ್ಕರೆ”

ಅಮರ
ತನ್ನಿಂದ ಎಲ್ಲವನ್ನೂ ಕಲಿತು ಇನ್ನೂ ಆಶ್ರಮದಲ್ಲೇ ಉಳಿದಿದ್ದ ಶಿಷ್ಯನಲ್ಲಿ ಗುರುಗಳೊಮ್ಮೆ ಕೇಳಿದರು..’ಶಿಷ್ಯಾ.. ನಿನಗೆ ಸಾವಿನ ನಂತರವೂ ಬದುಕಬೇಡವೇ..?’ . ಆಶ್ಚರ್ಯಚಕಿತನಾದ ಶಿಷ್ಯ ಗುರುಗಳನ್ನೇ ದಿಟ್ಟಿಸುತ್ತ ಕೇಳಿದ.. “ಅದು ಹೇಗೆ ಸಾದ್ಯ ಗುರುಗಳೇ? ”
ಹೋಗಿ ನೀನು ಕಲಿತ ಪಾಠವನ್ನೆಲ್ಲ ಜನರಿಗೆ ಹಂಚು…ಅದು ನೀನು ಸತ್ತ ನಂತರವೂ ನಿನ್ನನ್ನು ಅವರೊಳಗೆ ಬದುಕಿಸುತ್ತದೆ.. ಗುರುಗಳು ಉತ್ತರಿಸಿದರು.

ಅಮ್ಮ
ಬಂಜೆಯೆಂದು ಊರವರಿಂದಲೂ ಕುಟುಂಬಿಕರಿಂದಲೂ ತಿರಸ್ಕೃತಳಾಗಿದ್ದ ಹೆಣ್ಣೊಬ್ಬಳು ಹೇಳಿದ ಕತೆ..
‘ಮೂರು ವರ್ಷಗಳ ಹಿಂದೆ ಅನಾಥಶ್ರಮದಿಂದ ಮಗುವನ್ನು ದತ್ತು ತೆಗೆದುಕೊಂಡಿದ್ದೆ..ಆತ ಇಂದು ನನ್ನನ್ನು ”ಅಮ್ಮ” ಅಂತ ಕರೆದ.

ಭಕ್ತಿ
ಮಂದಿರದ ಮುಂದಿದ್ದ ಭಿಕ್ಷುಕರ ದಯನೀಯತೆ ಕಂಡು ಏನೂ ಕೊಡಲಾಗದ ಬಡವ ಶಿಷ್ಯನೊಬ್ಬ ತನ್ನ ಗುರುಗಳಲ್ಲಿ ತನ್ನ ಅಸಹಾಯಕತೆಯನ್ನು ತೋಡಿಕೊಂಡ..’ ಗುರುಗಳೇ ಭಗವಂತ ಇಷ್ಟು ಒಳ್ಳೆ ಅರೋಗ್ಯ ಕೊಟ್ಟರೂ ನನ್ನಿಂದ ಅವರಿಗೇನು ಸಹಾಯ ಮಾಡಲಾಗಿಲ್ಲ.. .’ . ‘ಇರುವ ಸಾವಿರದಲ್ಲಿ ಹತ್ತನ್ನು ಭಿಕ್ಷುಕರ ತಟ್ಟೆಗೆ ಎಸೆದು ಭೀಗುವ ಭೀರುಗಳಿಗಿಂತ ಏನೂ ಕೊಡಲಾಗಲಿಲ್ಲವೆಂದು ಕೊರಗುವವನೇ ದೇವರಿಗೆ ಹೆಚ್ಚು ಇಷ್ಟ..ಚಿಂತೆ ಮಾಡಬೇಡ ..’ ಗುರುಗಳು ಅವನನ್ನು ಸಮಾಧಾನಪಡಿಸಿದರು…

ವ್ಯಭಿಚಾರ
ಅವಳು ಎಂದಿನಂತೆ ಸೀರೆ ಉಟ್ಟು ಮಲ್ಲಿಗೆ ತೊಟ್ಟು ಬಸ್ ಸ್ಟ್ಯಾಂಡ್ ಬಳಿ ಗಿರಾಕಿಗಾಗಿ ಕಾಯುತ್ತಿದ್ದಳು. ‘ನನಗೆ ಅವಳನ್ನು ಅನುಭವಿಸಬೇಕು ಅನ್ನಿಸುತ್ತಿದೆ.. ಆದ್ರೆ ವ್ಯಭಿಚಾರ ತಪ್ಪು ಅಂತ ನನ್ನನ್ನು ಹತೋಟಿಗೆ ತರುತ್ತಿದ್ದೇನೆ ..’ ದೂರದಿಂದ ಅವಳನ್ನೇ ದಿಟ್ಟಿಸುತ್ತಾ ಅವನೆಂದ.. ಯಾವಾಗ ನಿನಗೆ ಅನ್ನಿಸಿತೋ ಆಗಲೇ ನೀನು ಅವಳನ್ನು ವ್ಯಭಿಚಾರ ಮಾಡಿ ಆಯಿತು.. ಪಕ್ಕದವ ಹೇಳಿದ.


Leave a Comment

ಕನ್ನಡ ಬ್ಲಾಗಲ್ಲಿ ಓದಲು ಇಲ್ಲಿ ಕ್ಲಿಕ್ಕಿಸಿ

ನ್ಯಾನೋ ಕಥೆಗಳು

ಇನ್ನಷ್ಟು ನ್ಯಾನೋ ಕತೆಗಳು


ಸ್ಥಿತಿ-ಗತಿ
ಕನ್ನಡ ಪರ ಸಂಘಟನೆಗಳ ಹೋರಾಟದ ಫಲವಾಗಿ ಕನ್ನಡ ಶಾಲೆಗಳನ್ನು ಮುಚ್ಚುವ ಬಗ್ಗೆ ಸರ್ಕಾರದ ಕೊನೆಯ ಪ್ರಸ್ತಾಪನೆ ಹೊರ ಬಿತ್ತು “ಶೇಕಡಾ 90 ರಷ್ಟು ಸರ್ಕಾರಿ ಶಾಲೆಗಳನ್ನು ಮುಚ್ಚುವುದಿಲ್ಲ”.
ಕನ್ನಡ ಶಾಲೆಗಳ ಸ್ಥಿತಿ -ಗತಿಗಳ ಅಧ್ಯಯನಕ್ಕೆ ನೇಮಕವಾದ ಆಯೋಗದ ವರದಿ ಮರುದಿನ ಪತ್ರಿಕೆಯಲ್ಲಿ ಪ್ರಕಟವಾಯ್ತು “ಶೇಕಡಾ 90 ರಷ್ಟು ಕನ್ನಡ ಶಾಲೆಗಳಿಗೆ ಬಾಗಿಲೇ ಇಲ್ಲ..!! ”

ಮಳೆ
ಥೂ ಈ ಹಾಳಾದ ಮಳೆ ಇಂದೇ ಬರಬೆಕಿತ್ತಾ ?… ತಾನು ಕಾತರತೆಯಿಂದ ಕಾಯುತ್ತಿದ್ದ ಕ್ರಿಕೆಟ್ ಪಂದ್ಯ ನಡೆಯದೆ ಹೋದುದಕ್ಕೆ ಬೇಸರಿಸುತ್ತ ಆತ ಗೊಣಗುಟ್ಟಿದ.. ದೂರದ ಹಳ್ಳಿಯೊಂದರಲ್ಲಿ ಮಳೆಗೆ ಕಾದು ಹೈರಾಣಾಗಿದ್ದ ರೈತರ ಸಂತಸ ಮುಗಿಲು ಮುಟ್ಟಿತ್ತು..

ತಪ್ಪು
ನಮ್ಮನ್ನು ಯಾರೂ ಅರ್ಥ ಮಾಡುತ್ತಿಲ್ಲ.. ಓಡಿ ಹೋಗಿ ಮದುವೆಯಾಗಿದ್ದೀವಿ.. ಅದರಲ್ಲೇನು ತಪ್ಪು ?? ತಂದೆ ತಾಯಿಯನ್ನು ಬಿಟ್ಟು ಓಡಿ ಹೋಗಿ ಮದುವೆಯಾದ ಹುಡುಗನೊಬ್ಬ ಗೆಳೆಯನಲ್ಲಿ ತನ್ನನ್ನು ತಾನೆ ಸಮರ್ಥಿಸುತ್ತಿದ್ದ.. ವರ್ಷಗಳುರುಳಿದವು.. ಅವನಿಗಿದ್ದ ಒಬ್ಬನೇ ಮಗ ತಂದೆಯ ಹಾದಿಯನ್ನೇ ತುಳಿದ..ಕಾಲ ಮೀರಿದ್ದರೂ ಈಗ ಅವನಿಗೆ ತಾನು ಮಾಡಿದ ತಪ್ಪಿನ ಅರಿವಾಯ್ತು…

ಹುಚ್ಚ
ಅವನೊಬ್ಬ ಅಮರ ಪ್ರೇಮಿ. ಅವಳ ಬರುವಿಕೆಗಾಗಿ ಜಾತಕ ಪಕ್ಷಿಯಂತೆ ಕಾದುಕುಳಿತ.. ಅವನ ಮಾತಲ್ಲೂ ಅವಳೇ ಮೌನದಲ್ಲೂ ಅವಳೇ . ಅವಳಾಡಿ ಹೋದ ಮಾತನ್ನು ,ಹಾಡನ್ನೂ ಬಡಬಡಿಸುತ್ತಿದ್ದ.. ಜಗದ ಪಾಲಿಗೆ ಈಗ ಅವನೊಬ್ಬ ಹುಚ್ಚ.

ಥ್ಯಾಂಕ್ಸ್
ಆತ ಪುರಸಭೆಯಲ್ಲಿ ಗುತ್ತಿಗೆ ಆಧಾರದ ಮೇಲೆ ಮಲ ಹೊರುವ ಕೆಲಸ ಮಾಡುತ್ತಿದ್ದ. ಸಂಜೆ ಮನೆಗೆ ಬಂದಾಗ ಆತನ ಮೊಗದಲ್ಲಿ ಅದೇನೋ ವಿಚಿತ್ರ ಸಂಭ್ರಮ. ಅವನ ಹೆಂಡತಿ ಕಾರಣ ಕೇಳಿದಳು. “ಇಂದು ರಾಜರಾಮರ ೪ ಅಂತಸ್ತಿನ ಮನೆಯಲ್ಲಿ ಕೆಲಸವಿತ್ತು ಕಣೇ, ಕೆಲಸ ಮುಗಿಸಿ ಬರುವಾಗ ಧಣಿಗಳು ದುಡ್ಡು ಕೊಟ್ಟರು , ಜೊತೆಗೆ ‘ಥ್ಯಾಂಕ್ಸ್’ ಎಂದರು.


Leave a Comment

ಕನ್ನಡ ಬ್ಲಾಗಲ್ಲಿ ಓದಲು ಇಲ್ಲಿ ಕ್ಲಿಕ್ಕಿಸಿ

ನ್ಯಾನೋ ಕಥೆಗಳು

ಇನ್ನಷ್ಟು ನ್ಯಾನೋ ಕತೆಗಳು


ಕೋಮುವಾದ
ಆತ ಸಂಘಟನೆಯೊಂದರ ಮುಖಂಡ ಹಾಗು ಸ್ವಯಂ ಘೋಷಿತ ರಾಷ್ಟ್ರ ಭಕ್ತ ..ಭಿನ್ನ ಕೋಮಿನ ಯುವಕ ಯುವತಿಯರು ಮಾತಾಡುವುದನ್ನು ಸಂಸ್ಕೃತಿಯ ಹೆಸರಲ್ಲಿ ವಿರೋಧಿಸುತ್ತಿದ್ದ . ಅದಕ್ಕಾಗಿ ನೈತಿಕ ಪೋಲೀಸರ ಗುಂಪನ್ನೇ ಬೆಳೆಸಿದ್ದ.
ಅದೊಂದು ದಿನ ಆತ ಎಲ್ಲೋ ಹೊರಡಲು ಅಣಿಯಾಗುತ್ತಿದ್ದಂತೆ ಮೊಬೈಲ್ ರಿಂಗಣಿಸಿತು.. ಅಣ್ಣಾ.. ಇಬ್ಬರನ್ನು ಪಾರ್ಕಿನಲ್ಲಿ ಹಿಡ್ಕೊಂದಿದ್ದೀವಿ .. ಹುಡುಗಿ ನಮ್ಮ ಜಾತಿ.. ಹುಡುಗ ಬೇರೆ ಜಾತಿ.. “ಬಿಡಬೇಡಿ.. ಅವರನ್ನ .. ಸರಿಯಾಗಿ ಬುದ್ದಿ ಕಲಿಸಿ ”
ಆತ ಫೋನಿಟ್ಟ . ಸಂಜೆ ಮನೆಗೆ ಬಂದಾಗ ಕಾಲೇಜಿಂದ ಬಂದ ತನ್ನ ಮಗಳ ಬೆನ್ನಲ್ಲಿ ಬಾಸುಂಡೆ ಎದ್ದಿತ್ತು.

ಶವಪೆಟ್ಟಿಗೆ
ಆತ ಶವಪೆಟ್ಟಿಗೆ ತಯಾರಿಸಿ ಮಾರಾಟ ಮಾಡುತ್ತಿದ್ದ. ಮಳೆಗಾಲದಲ್ಲಿ ಆತನ ವ್ಯವಹಾರ ಕುಸಿದಿತ್ತು. ಮಾತಿನ ನಡುವೆ “ಈ ಮಳೆಗಾಲದಲ್ಲಿ ಯಾರೂ ಸತ್ತಿಲ್ಲ” ಅಂತ ತನ್ನ ತನ್ನ ಗೆಳೆಯನಲ್ಲಿ ಅಳಲು ತೋಡಿಕೊಳ್ಳುವಷ್ಟರಲ್ಲಿ ‘ನಮ್ಮೂರಿಗೆ ಬರುತ್ತಿದ್ದ ಗವರ್ಮೆಂಟ್ ಬಸ್ಸು ಸೇತುವೆ ಕೆಳಗೆ ಬಿದ್ದು ಕೆಲವರು ಸತ್ರಂತೆ ‘ ಓಡಿ ಬಂದ ಅವನ ಸಹಾಯಕ ಏದುಸಿರು ಬಿಡುತ್ತ ಉಸುರಿದ. ಆತನಿಗೆ ಒಳಗೊಳಗೇ ಸಂಭ್ರಮ. ಕೂಡಲೇ ಕಾರ್ಯ ಪ್ರವೃತ್ತನಾದ. ಕೆಲ ಸಮಯದ ಬಳಿಕ ಮೊಬೈಲ್ ರಿಂಗಣಿಸಿತು.. “ರೀ.. ರೀ… ನಮ್ .. ನಮ್… ನಮ್ಮಗಳು ಬ.. ಬ ಬಸ್ಸು ಸೇ .. ಸೇ..ಸೇತುವೆ ” ಆತ ಫೋನಿಟ್ಟು ತನ್ನ ಮಗಳಿಗೆ ಸರಿ ಹೊಂದುವ ಶವಪೆಟ್ಟಿಗೆಯನ್ನು ಹುಡುಕಾಡ ತೊಡಗಿದ.

ದೂರ
ಆಗಷ್ಟೇ ಯಶಸ್ವಿಯಾಗಿ ಚಂದ್ರಯಾನ ಮುಗಿಸಿ ಬಂದ ಭಾರತೀಯ ಮೂಲದ ನಾಸಾ ವಿಜ್ಞಾನಿಯ ತಾಯಿಯನ್ನು ಮಾತನಾಡಿಸಲು ಪತ್ರಕರ್ತರು ಅವರ ಮನೆಗೆ ಬಂದಿದ್ದರು. “ನಿಮ್ಮ ಮಗ ಕೊನೆಯ ಬಾರಿಗೆ ನಿಮ್ಮನ್ನು ನೋಡಲು ಬಂದದ್ದು ಯಾವಾಗ ?” . ಮಾತಿನ ನಡುವೆ ತೂರಿ ಬಂದ ಪ್ರಶ್ನೆಗೆ ಉತ್ತರಿಸಲಾರದೆ ಆಕೆಗೆ ದುಃಖ ಒತ್ತರಿಸಿ ಬಂದಿತ್ತು. ಬಹುಶಃ ಚಂದ್ರ ಲೋಕಕ್ಕಿಂತ ತಾಯಿ ಮನೆ ಮಗನಿಗೆ ದೂರವಾಗಿದ್ದಿರಬೇಕು.

ಭಕ್ತಿ
ಇಬ್ಬರು ಗೆಳೆಯರಲ್ಲಿ ಒಬ್ಬ ಅಪ್ಪಟ ದೈವ ಭಕ್ತನಾಗಿದ್ದ. ಏನೇ ಕೆಲಸಕ್ಕೂ ದೇವರ ಮೊರೆ ಹೋಗುತ್ತಿದ್ದ. ಅವರಿಬ್ಬರೂ ಮಾವಿನ ಮರದ ಕೆಳಗಡೆಯಿಂದ ಹಾದು ಹೋಗಲು ಅದರ ಹಣ್ಣು ಅವರ ಕಣ್ಣು ಕುಕ್ಕಿತು. ದೈವ ಭಕ್ತ ಅಲ್ಲೇ ದೇವರಿಗೆ ಮೊರೆಯಿಟ್ಟ .”ಭಗವಂತಾ.. ಒಂದು ಹಣ್ಣನ್ನಾದರೂ ಬೀಳಿಸು…! ” ಮತ್ತೊಬ್ಬ ಕಲ್ಲೆತ್ತಿ ಎಸೆದ .. ಹಣ್ಣು ಬಿತ್ತು .. ಹಣ್ಣನ್ನು ಚಪ್ಪರಿಸುತ್ತ ಆತ ಗೆಳೆಯನನ್ನು ದಿಟ್ಟಿಸಿದ.. ಅವನು ಪ್ರಾರ್ಥಿಸುತ್ತಲೇ ಇದ್ದ.

ವಿಚಿತ್ರ
“ಸಹನೆಯನ್ನು ಬೆಳೆಸಿ ..ಹಿಂಸೆಯಿಂದ ಸಾಧಿಸುವುದೆನಿಲ್ಲ …” ಎಂದು ಟ್ವೀಟ್ ಮಾಡಿ ಶಾಂತಿದೂತನಾದ ಬಾಲಿವುಡ್ ನಾಯಕನೊಬ್ಬ .. ಮರುದಿನ ಪಾರ್ಟಿಯಲ್ಲಿ ಗೆಳತಿಯ ಗಂಡನಿಗೆ ಕಪಾಳಮೋಕ್ಷ ಮಾಡಿದ್ದ..!

ವಿಪರ್ಯಾಸ
ಆತ ಕಟ್ಟಾ ಬ್ರಹ್ಮಚಾರಿ.. ದಿನಕ್ಕೆ ನಾಲ್ಕು ಕಡೆ ಬ್ರಹ್ಮಚರ್ಯೆಯ ಬಗ್ಗೆ ಕ್ಯಾಂಪ್ ನಡೆಸಿ ಜನರನ್ನು ಸೆಳೆಯುತ್ತಿದ್ದ. ವಿಪರ್ಯಾಸವೆಂದರೆ ಆತನ ತಂದೆಯೂ ಅವನ ಹಾದಿ ಹಿಡಿದಿದ್ದರೆ ಇಂದು ಆತ ಇರುತ್ತಿರಲಿಲ್ಲ ಎಂಬುದನ್ನು ಮರೆತಿದ್ದ.

Leave a Comment

ನ್ಯಾನೋ ಕಥೆಗಳು

ಜಾಹೀರಾತು ಮತ್ತಿತರ ಕತೆಗಳು


ಜಾಹೀರಾತು
ಅವನ ಹಳೆಯ ಮನೆಯೆದುರಿಗಿದ್ದ ಬ್ಯಾಂಕ್ ಜಾಹೀರಾತು ಫಲಕದಲ್ಲಿ ತನ್ನ ನೆಚ್ಚಿನ ಸಿನಿಮಾ ನಟ ನಗುತ್ತ ನಿಂತಿದ್ದ . “ಸ್ನೇಹಿತನಾಗಿ, ಮಾರ್ಗದರ್ಶಕನಾಗಿ ಸದಾ ನಿಮ್ಮೊಂದಿಗೆ “ಎಂಬ ಒಕ್ಕಣೆಯೂ ಅಲ್ಲಿತ್ತು. ಅದನ್ನು ನೋಡಿದವನೇ ಖುಷಿಯಿಂದ ಅದೇ ಬ್ಯಾಕಿಂದ ಹೊಸ ಮನೆ ಕಟ್ಟಲು ‘ಮನೆಸಾಲ’ ಮಾಡಿದ. ವರ್ಷಗಳ ನಂತರ ಅವನಿಗೆ ಸಾಲ ಹಿಂದಿರುಗಿಸಲಾಗದೆ ಬ್ಯಾಂಕಿನವರು ಬಂದು ಮನೆ ಜಪ್ತಿ ಮಾಡಿ ಅವನನ್ನು ಹೊರಗಟ್ಟಿದರು.. ಉಮ್ಮಳಿಸಿ ಬರುವ ದುಃಖದಿಂದ ಆತ ಫಲಕವನ್ನೊಮ್ಮೆ ನೋಡಿದ.. ಅವನ ನೆಚ್ಚಿನ ನಟ ನಗುತ್ತ ನಿಂತಿದ್ದ..

ಕಾಡು ಮನುಷ್ಯ
ಆತ ಬಾಲ್ಯದಲ್ಲೇ ಮನೆಬಿಟ್ಟು ಕಾಡು ಸೇರಿ ಡಕಾಯಿತರ ಗುಂಪು ಸೇರಿದ್ದ. ಈಗ ಅವನೇ ಆ ಗುಂಪಿಗೆ ನಾಯಕ.. ಒಂದಿ ದಿನ ಕಾಡು ದಾರಿಯಿಂದ ವ್ಯಾಪಾರ ಮುಗಿಸಿ ಬರಿತ್ತಿದ್ದ ೩ ಜನರ ಗುಂಪನ್ನು ಕೊಂದು ಅವರಲ್ಲಿದ್ದ ಹಣವನ್ನೆಲ್ಲ ದೋಚಿದ..ಸಾಯುವ ವೇಳೆ ಅದರಲ್ಲಿದ್ದ ಮುದುಕನ ಆಕ್ರಂದನ ಆತನಲ್ಲಿ ಬದಲಾವಣೆಯನ್ನು ತಂದಿತ್ತು. ಆತ ಎಲ್ಲವನ್ನು ಬಿಟ್ಟು ಊರು ಕಡೆ ದಾರಿ ಹಿಡಿದ.. ಸಂತಸದಿಂದಲೇ ತನಗೆ ಮರೆತು ಹೋಗಿದ್ದ ತಂದೆ-ತಾಯಿಯ ಮುಖವನ್ನು ನೆನಪಿಗೆ ತರಲು ಪ್ರಯತ್ನಿಸುತ್ತಿದ್ದ..
ತಾಯಿಯನ್ನು ಕಂಡವನೇ ಕಾಲಿಗೆರಗಿ ಕ್ಷಮೆ ಕೇಳಿ ತನ್ನ ತಂದೆಯ ಬಗ್ಗೆ ವಿಚಾರಿಸಿದ.. ತಾಯಿ ಅಳುತ್ತ ನುಡಿದಳು..”ಮೊನ್ನೆ ಕಾಡು ದಾರಿಯಲ್ಲಿ ಬರುತ್ತಿದ್ದ ನಿಮ್ಮಪ್ಪನನ್ನು ಕಾಡು ಮನುಷ್ಯರು ಕೊಂದು ಹಾಕಿದ್ರು.. ”

ಮದುವೆ
ಮೂವರು ಸ್ನೇಹಿತರು ಕಾರಿನಲ್ಲಿ ಪ್ರವಾಸ ಹೊರಟಿದ್ದರು.. ಚಾಲಕ ವಾಯುವೇಗದಲ್ಲಿ ಕಾರನ್ನು ಓಡಿಸ ತೊಡಗಿದಾಗ ಒಬ್ಬಾತ ತಮಾಷೆಯಾಗಿ ಹೇಳಿದ “ಗುರೂ.. ಕಾರನ್ನು ಮೆಲ್ಲ ಓಡಿಸು .. ನನಗಿನ್ನೂ ‘ಮದುವೆ’ ಆಗಿಲ್ಲ “.. ಮತ್ತೊಬ್ಬ ಗಂಭೀರವಾಗಿ ಹೇಳಿದ “ಕಾರನ್ನು ಮೆಲ್ಲ ಓಡಿಸು… ನನಗೆ ‘ಮದುವೆ’ ಆಗಿದೆ “.

ಹೆಣ್ಣು
“ಅಪ್ಪಾ ಇದಿರಲಿ ಖರ್ಚಿಗೆ… ಅಣ್ಣ ಈ ವಾರನು ಬರದಿದ್ದರೆ .. ನೀನು ಇಲ್ಲೇ ಬಾ ..ಇಲ್ಲೇ ಇರೋಣ… ” ಮಗಳು ಕೊಟ್ಟ ದುಡ್ಡನ್ನು ಜೇಬಿಗಿಳಿಸುತ್ತ ಹೊರಟ ಆತನಿಗೆ “ಇಷ್ಟು ಕಷ್ಟಪಟ್ಟು ಹೆತ್ತಿದ್ದು ಹೆಣ್ಣನ್ನಾ….? ” ತಾನು ಹಿಂದೆ ಹೆಂಡತಿಗೆ ಕೇಳಿದ ಪ್ರಶ್ನೆ ಚೂರಿಯಾಗಿ ಎದೆಗೆ ತಿವಿಯುತ್ತಿತ್ತು …ಅವನರಿಯದೆ ಕಣ್ಣು ತೇವಗೊಂಡಿತ್ತು …

ಕೊಂದ ದಿನ
ಅಪ್ಪಾ..ಗಾಂಧೀ ತಾತನನ್ನು ಕೊಂದ ದಿವಸ ಯಾವುದಪ್ಪ ..? ಗೊತ್ತಿಲ್ಲ್ಲ ಮಗೂ ಇತ್ತೀಚಿಗಂತೂ ಪ್ರತೀದಿನ ಕೊಲ್ಲುತ್ತಿದ್ದೇವೆ.


Leave a Comment

ನ್ಯಾನೋ ಕಥೆಗಳು

ಒಂದಿಷ್ಟು ನ್ಯಾನೋ ಕತೆಗಳು


ದುಬಾರಿ ಕಸ
ನಗರದ ತ್ಯಾಜ್ಯ ವಿಲೇವಾರಿಯನ್ನು ಸುಗಮ ಗೊಳಿಸಲು ಸರಕಾರವು ವಿದೇಶದಿಂದ ಅತ್ಯಾದುನಿಕ ಕಸದ ತೊಟ್ಟಿಗಳನ್ನು ತರಿಸಿ ಬೀದಿ ಬೀದಿಯಲ್ಲಿ ಸ್ಥಾಪಿಸಿದ್ದರು. ಅದರ ಅಂದ ನೋಡುತ್ತಾ ಇಬ್ಬರು ಪರಸ್ಪರ ಮಾತನಾಡಿಕೊಳ್ಳುತ್ತಿದ್ದರು…’ಇದರಲ್ಲೂ ಹಾಕುವ ಕಸವು ಅಷ್ಟೇ “ದುಬಾರಿಯದ್ದಾಗಿರಬೇಕು”…’ ಮತ್ತೊಬ್ಬ ಹೌದೆನ್ನುತ್ತ ತಲೆಯಾಡಿಸಿದ.. ಮರುದಿನ ಬೆಳಿಗ್ಗೆ ಕಸದೊಂದಿಗೆ ಆಗಷ್ಟೇ ಹುಟ್ಟಿದ ನವ ಜಾತ ಹೆಣ್ಣು ಮಗು ಸಿಕ್ಕಿತ್ತು.

ಹಣ

ಆತ ಮದುವೆಯಾಗಿ ೬ ತಿಂಗಳಾಗುವಷ್ಟರಲ್ಲಿ ಉದ್ಯೋಗ ಅರಸಿ ದುಬೈಗೆ ಹೊರಟ. ಕೈ ತುಂಬಾ ಸಂಬಳದ ಕೆಲಸವೊಂದು ಸಿಕ್ಕಿತ್ತು.. ಒಂದು ವರ್ಷದಲ್ಲೇ ತನ್ನದೇ ಆದ ಬಿಸಿನೆಸ್ ಆರಂಭಿಸಿದ. ನೋಡ ನೋಡುತ್ತಲೇ ಆತ ಕೊಟ್ಯಾದಿಪತಿಯಾದ .. ವರ್ಷಗಳ ನಂತರ ಕೈ ತುಂಬು ದುಡ್ದೊಂದಿಗೆ ಆತ ಆತ ಊರಿಗೆ ಹೊರಟಿದ್ದ . ತನ್ನ ಹೆಂಡತಿಯ ಜೊತೆಗಿದ್ದ ಹಾಲುಗಲ್ಲದ ಮಗು ಆತನ್ನು ನೋಡಿದವನೇ ಕೈ ತೋರಿಸಿ “ಇದ್ಯಾರಮ್ಮ ” ಅಂತ ಕೇಳಿದ.. ಆತನಿಗೆ ಮೊತ್ತ ಮೊದಲಾಗಿ ಹಣದ ಮೇಲೆ ಜಿಗುಪ್ಸೆ ಹುಟ್ಟಿತು.

ವಿಚಿತ್ರ
ಫೇಸ್ ಬುಕ್ ನಲ್ಲಿ ಸಿಕ್ಕ ಸಿಕ್ಕವರ ವಾಲ್ ಮೇಲೆ ಪೋಸ್ಟ್ ಮಾಡಿದ ಅವನು .. ತನ್ನ ಸ್ವಂತ ಮನೆಯ ಗೋಡೆ ಮೇಲೆ ತನ್ನ ಮಗ ಕರಿ ಹಲಗೆಯಿಂದ ಚಿತ್ರ ಗೀಚಿದ್ದನ್ನು ನೋಡಿ ಕೆಂಡಾಮಂಡಲನಾದ .

ನಂಬಿಕೆ
‘ನಂಬಿಕೆಯೇ ದಾಂಪತ್ಯದ ಬುನಾದಿ’. ಧರ್ಮ ಗುರುಗಳು ದಾಂಪತ್ಯದ ಬಗ್ಗೆ ಉಪನ್ಯಾಸ ನೀಡುತ್ತಾ ನುಡಿದರು . ಹೌದು .. ಒಬ್ಬರಿಗೊಬ್ಬರು ಮಾಡಿದ ಮೋಸ ತಿಳಿದಿಲ್ಲವೆಂಬ ಅಚಲ ನಂಬಿಕೆ.. ಸಭಿಕರಲ್ಲೊಬ್ಬ ಪಿಸುಗುಟ್ಟಿದ.

ವಿಪರ್ಯಾಸ
ಬೋಳು ತಲೆಯವ ತನಗಾಗಿ ಹೆಣ್ಣು ನೋಡಲು ಹೋಗಿ .. ಹುಡುಗಿಯ ಕೂದಲು ಉದ್ದವಿಲ್ಲವೆಂದು ತಿರಸ್ಕರಿಸಿ ಬಂದಿದ್ದ..


Leave a Comment