ಕಾಡುವ ಹನಿಗಳು, ನೀನೆಂದರೆ.., ನೆನಪಿನ ಹನಿ, ಮನಸಿನ ಹಾ(ಪಾ)ಡು

ನೀನೆಂದರೆ..

shadow and girl

ನೀನೆಂದರೆ..

ಕಾದು ಕಾವಲಿಯಾದ ಮನಸಿಗೆ
ಹೊಂಗೆ ತಂಪು
ಇರುಳ ಕರಾಳತೆಯಲ್ಲಿ
ಕಳೆದು ಹೋಗುವ
ಕನಸು..!

ನೀನೆಂದರೆ..

ಕಲ್ಪನೆ, ಪರಿಕಲ್ಪನೆ
ಬದಲಾವಣೆ!
ನಾಳೆಯ ನಿರೀಕ್ಷೆ,
ಪ್ರತೀಕ್ಷೆ !

ನೀನೆಂದರೆ..

ಮುಂಗುರುಳು ಮುಂಜಾನೆಯ
ಮಂಜ ಹನಿ,
ಕೇಳಿದಷ್ಟೂ ಕೇಳಬೇಕೆನಿಸುವ
ಕಹಾನಿ!

ನೀನೆಂದರೆ..

ನನ್ನೊಳಗಿನ ತುಮುಲ,
ಹೊಯ್ದಾಟ!
ತನ್ನ ಅಸ್ತಿತ್ವಕ್ಕಾಗಿ
ಮಾತಿನ ಮೊರೆ ಹೋದ
ಪರಾವಲಂಬಿ ಮೌನ !

ನೀನೆಂದರೆ..

ಭರವಸೆಯ ಆಲಿಂಗನ,
ಕಣ್ಣೋಟದ
ಸಿಹಿ ಚುಂಬನ…!
ಒಂಟಿ ಕತ್ತಲ ಏಕಾಂಗಿತನ..

ಮತ್ತೆ ನನ್ನೀ
ಜೀವನ..!


ಹೇಗಿದೆ ಹೇಳಿ

ಹುಸೇನಿ ಪದ್ಯಗಳು - 6, ಹುಸೇನಿ_ಪದ್ಯಗಳು

ಹುಸೇನಿ ಪದ್ಯಗಳು – 6

ನಿನ್ನ ನೆನಪಿನಿಂದ
ಹುಟ್ಟಿದ ಈ
ಕವನ
ನಿನ್ನದೋ
ನನ್ನದೋ ..
ಗೊಂದಲವಿದೆ!
———
ನಿನ್ನ ಎದೆಯಾಳದ
ಹಂದರಕ್ಕೆ
ಈಜು ಬಾರದೆ
ಇಳಿದು
ದಿಕ್ಕಾಪಾಲಾದ
ನನ್ನ ಸ್ಥಿತಿಗೆ
ಪರಿಭ್ರಮಿಸುತ್ತೇನೆ…
ಕೆಲವೊಮ್ಮೆ
ಸಂಭ್ರಮಿಸುತ್ತೇನೆ..!
———
ನೀ ನನಗೆ
ನಷ್ಟವಾಗಬಹುದು ..
ಎಂದಲ್ಲ..
ನಾನಿನಗೆ
ನಷ್ಟವಾದರೆ
ನನ್ನಷ್ಟು ನಿನ್ನ
ಯಾರು ತಾನೇ
ಪ್ರೀತಿ ಮಾಡಿಯಾರು
ಎಂಬ ಭಯವಿದೆ….!
———
ನಿನ್ನೊಲುಮೆಯ
ರಾಗವನ್ನು
ಪದಗಳಲ್ಲಿ
ಕಟ್ಟಿ ಹಾಕುವ
ವ್ಯರ್ಥ ಪ್ರಯತ್ನ
ಈ ಕವನ
———
ನಿನ್ನ ಕಾಡುವ
ನೆನಪುಗಳಿಗೆ
ಲಗಾಮು ಹಾಕುವ
ಪ್ರಯತ್ನದಲ್ಲಿ
ಪ್ರತೀ ಬಾರಿ
ಸೋಲುತ್ತಿದ್ದೇನೆ..
———


Leave a Comment

ಹುಸೇನಿ ಪದ್ಯಗಳು - 5, ಹುಸೇನಿ_ಪದ್ಯಗಳು

ಹುಸೇನಿ ಪದ್ಯಗಳು – 5

ಆ ನಿನ್ನ ಬಿಚ್ಚು
ನಗುವಿನ ಹಿಂದೆ
ಅದೆಷ್ಟು
ಬತ್ತದ ಕಣ್ಣೀರು!
———-
ಚದುರಿದ ಕನಸೊಂದಿಗೆ
ಜೀವಿಸುವುದಕ್ಕಿಂತ
ಒಳಿತು
ಮರೆಯದ ನೆನಪುಗಳೊಂದಿಗೆ
ಸಾಯುವುದು ಅಲ್ಲವೇ ?
——–
ದೂರದಲ್ಲೆಲ್ಲೋ
ಕಂಡ ಬೆಳಕನ್ನು
ನೀನು
ಬೆಂಬತ್ತಿದಾಗ
ನನ್ನೊಳಗೆ ಬರೀ
ಕತ್ತಲು…
———
ನೀನು ನಿನ್ನ
ಪ್ರೀತಿಯನ್ನೆಲ್ಲ
ಮಾತಲ್ಲೇ ತೋರಿಸಿದೆ
ನಾನು
ನನ್ನ
ಜೀವನದಲ್ಲೂ…!!


Leave a Comment

ಹುಸೇನಿ ಪದ್ಯಗಳು - 4, ಹುಸೇನಿ_ಪದ್ಯಗಳು

ಹುಸೇನಿ ಪದ್ಯಗಳು – 4

ನೀನಿಲ್ಲದೆ
ಬದುಕುವ
ಬವಣೆಯ
ನೆನೆದು ….
ಒಂಟಿತನ
ನೀಗಲು ನಿನ್ನ
ನೆನಪಿನ ಜೊತೆ
ಹೊರಟಿದ್ದೇನೆ..——–

ನಿನ್ನ ನೆನಪಿನ
ತನ್ಮಯತೆಯಿಂದ
ನನಗರಿಯದೆ
ಕಣ್ಣಿಂದ
ಜಾರಿಬಿದ್ದ
ಹನಿಯಲ್ಲೂ
ನಿನ್ನ ಸ್ಪರ್ಶದ
ಅನುಭೂತಿಯಿತ್ತು….!!

——–

ಹೃದಯವ ಅಡವಿಟ್ಟು
ಪ್ರೀತಿಯ ಖರೀದಿಗೆ
ಹೊರಟೆ..
ಆದರೆ..
ಈಗ ತಿಳಿಯಿತು..
ಹೃದಯವಿಲ್ಲದವನಿಗೆ
ಪ್ರೀತಿ
ಸಿಗಲಾರದೆಂದು…

———–

ಇನ್ನೂ ನಾನು
ಪ್ರೀತಿಸುತ್ತೇನೆ..
ನಿನ್ನನ್ನೋ..
ನೀ ಕೊಟ್ಟ
ಸಕ್ಕರೆ
ನೆನಪುಗಳನ್ನೋ..
ಗೊಂದಲವಿದೆ!


Leave a Comment

ಹುಸೇನಿ ಪದ್ಯಗಳು - 3, ಹುಸೇನಿ_ಪದ್ಯಗಳು

ಹುಸೇನಿ ಪದ್ಯಗಳು – 3

ದೂರದಲ್ಲಿ ಅದೆಲ್ಲೋ
ನೀನು ಕಣ್ಣಿಗೆ ಕಾಡಿಗೆ
ತೀಡಿರಬೇಕು …
ಇಲ್ಲಿ ಆಗಸದ
ತುಂಬೆಲ್ಲ
ಕಾರ್ಮೋಡ….**********

ಎಲ್ಲೆಲ್ಲೋ
ಹುಡುಕಿದೆ
ನಿನ್ನ ..
ನೀನು ಮಹಾ ಕಳ್ಳಿ,
ಈ ಕವಿತೆಯಲ್ಲೆ
ಅಡಗಿದಿಯಲ್ಲೇ..?

**********

ಅಬ್ಬಾ…
ಹೊರಗಡೆ
ಚುಮು ಚುಮು ಚಳಿ..
ನಾ ನಿನ್ನ
ನೆನಪ ಹೊದ್ದು
ಬೆಚ್ಚಗೆ ಮಲಗಿದೆ..

**********

ಇಂದು ನನ್ನ ಮೇಲೆ
ನೀನಿತ್ತ
ಗುಲಾಬಿ
ಮಾತ್ರ ಸಾಕು
ನಾನು
ಪುನರ್ಜನ್ಮಿಸಲು….


Leave a Comment

ಹುಸೇನಿ ಪದ್ಯಗಳು - 2, ಹುಸೇನಿ_ಪದ್ಯಗಳು

ಹುಸೇನಿ ಪದ್ಯಗಳು – 2

ನನ್ನ ಎಷ್ಟು
ಪ್ರೀತಿಸ್ತೀಯ..?ಉತ್ತರಕ್ಕಾಗಿ
ಪದಗಳು
ಸಾಲದೆ
ಆತ
ಮೌನವಾಗಿದ್ದ…

++++++++++

ನಿನಗೆ
ಅವಳು
ಕೊಟ್ಟ
ದುಬಾರಿಯಾದ
ಉಡುಗೊರೆ
ಯಾವುದು
………
ಕಣ್ಣೀರು!!

++++++

ನೀ
ಕೊಟ್ಟ
ನೋವನ್ನು
ನನ್ನ
ಒಡಲಾಳಕ್ಕೆ
ಇಳಿಸಿದ್ದೇನೆ
ಅದು
ಕವಿತೆಯಾಗಿ
ಆವಿಯಾಗುತಿದೆ..

+++++

ಅಚಾನಕ್ಕಾಗಿ
ಸಿಕ್ಕ ಅವನು
ಕೇಳಿದ
ಹೇಗಿದೆ
ನಿನ್ನ ಜೀವನ..
ನಸುನಗುತ್ತ ಆತ
ಉತ್ತರಿಸಿದ
ಅವಳು ಚೆನ್ನಾಗಿದ್ದಾಳೆ!

Leave a Comment

ನೆನಪುಗಳು ಮಾತ್ರ.. !

ನೆನಪುಗಳು ಮಾತ್ರ.. !

ಬಣ್ಣಗಳಿಲ್ಲದ ನನ್ನ ಮನಸ್ಸೆಂಬ ಹಾಳೆಯಲಿ
ಕಣ್ಣೀರಿನ ಮಸಿಯಿಂದ ನಾನು ಬರೆದ ಕವಿತೆಯಲಿ
ನಿನ್ನ ಕುರಿತಾದ ಬಣ್ಣ ಬಣ್ಣದ ನೆನಪುಗಳು ಮಾತ್ರ !!